Shillong, Lber 25: U Symbud Myntri Rangbah ka Jylla ba khmih ïa ka Tnad Public Works Department (PWD) Bah Prestone Tynsong hynne ka sngi thohdieng ula ïathuh ba ka Sorkar kala aipor ïa u Executive Engineer ka PWD (Building) Bah Ransom Sutnga ban ai jubab hapoh une u bnai halor ka jingkynnoh donkti ha ki kam saiñ pyrthei
“Ngi la dep phah ïa ka show cause sha une u Engineer bad ngi dang ap mynta ïa ka jubab. Ka por bala ai ka long haduh ba kut jong une u bnai” ong u Bah Prestone.
Haba kylli, u Symbud Myntri Rangbah ula ong ba um lah satia ban ong eiei ïa mynta namar kaei kaba ka sorkar kan leh kan shong eh ha ka jingpynshai jong u Bah Ransom.“Hadien ba ngi ïoh pdiang, ngin sa peit ïa kaei kaba ngi dei ban leh” ula ong
Ha ka Dorbar Mang tyngka ba dang shu kut, u MLA ka AITC na Rangsakona Zenith Sangma ula wanrah da ka Zero Hour Notice hapoh ka Ïingdorbar bad dawa ba dei ban ai jingpynsajia ïa u Bah Ransom namar ka jingpynkheiñ ïa ka Meghalaya Service Conduct Rules, 2019.
Haba sot ïa ki kot khubor, u Zenith ula ong ba u Bah Ransom, uba dei u Executive Engineer ka PWD (Building) bad u Dr WR Kharlukhi uba dei u MP ka Rajya Sabha bad President ka NPP-Meghalaya, kila pynlong ïa ka jingïalang jong ka Party (NPP) ha Shillong North Constituency dang shen.
Ha kane ka jingïalang, u Dr Kharlukhi ula pynithuh bad pynkup burom da kaba pyndeng ïa ka labon lama (scarf) bad pynbna ruh ïa u Bah Ransom kum u kyrtong jong ka NPP na Shillong North Constituency ha ka elekshon MLA ban wan (2023).
Haba kylli la ki dang don ki jingujor ba ïoh pdiang pyrshah ïa ki Shakri Sorkar kiba ïashimbynta ha ki kam saiñ pyrthei katba ki dang don ha ka jingshakri, u Symbud Myntri Rangbah ula ong ba um shym la don jingtip satia ïa kum kane.
