Ki Party Riewlum ki kut tang ha Byrnihat, kynthoh u MDC ka Mawlai mar ia rung sha ka NPP
Shillong, Lber 25 : Khyndiat minit mar ia dep pyniasoh pura sha ka National People’s Party (NPP), u MDC ka Mawlai, Bah Teibor Pathaw uba ju don baroh shi katta bad ka UDP u la kynthoh kylla ba ki party riewlum kiba don ha ka jylla kin ym poi shaei shaei ruh.
“Ki party riewlum jongngi kiba bun ki shu kut tang ha Byrnihat bad ym don jaka ia ki ban leit shabar. Ka party NPP kadei ka party kaba poi shaduh Delhi ban pynsngew ia ki jingeh jongngi. Ngi khmih lynti ba ha kane ka snem 2023 ngi don ka jingkyrmen ba kane ka party kan lah ban treikam da ka jingkyrshan jongngi ba ngin lah ban synshar marwei ha kane ka jylla jongngi,” u la ong.
Katei ka jingkynthoh jong utei u MDC ka dei ha ka sngi ba ka National Peoples Party (NPP) kaba ialam ia ka sorkar ha ka jylla, ha ka sngi Thohdieng ka la pdiang burom ia u bad ki nongkyrshan ban iasoh pura noh sha ka party ha ka jingialang pdiang burom kaba shongkun bha kaba long ha Mawlai Mawdatbaki.
Ha kane ka jingialang pdiang burom la donlang ruh naduh u Myntri Rangbah ka Jylla, Conrad K Sangma ba dei u National President ka NPP, nangta u National Vice President ka Party bad Symbud Myntri Rangbah Bah Prestone Tynsong, Working President ka State NPP bad Myntri ka tnad Urban, Bah Sniawbhalang Dhar nalor bun ngut ki MLA bad MDC ka party.
Na ka liang u MDC u la pynpaw ruh ba ka dawbah kaba pynlong ia u ban leit iasoh pura sha ka NPP kadei namar u iohi ba ka NPP ka don ia ki nongialam kiba shemphang bad kiba thrang ban trei bad shakri ia ki paidbah ka jylla. U la ong ruh ba katei ka party nalor ba ka la dei ka National Party hynrei kadei ka party kaba la tip ruh kum ka sur ki jylla ka thain shatei lammihngi jong ka Ri.
U ong ruh ba dei tang kane ka sorkar ba ialam da ka NPP kaba nud ban shim bad rai bun ki ishu kiba kiwei pat ki sorkar ha ki snem ba la dep kim nud satia ban leh na ki daw kiba bun.
“Ngi don mynta tang kawei ka thong, kata ban trei borbah khnang ba ngin jop suk ha u 2023,” u la bynrap biang.