Shillong, Lber :U MLA ka Mawlai u Bah PT Sawkmie hynne ka sngi Thohdieng u la noh synñiang da ki shuki, duli bad kor computer sha ka dorbar shnong Mawlai Kyntonmassar na ka bynta ban buh ha ïing shnong kaba dang dep tei thymmai kaba dang donkam bha ïa kine ki tiar.
ïa kine ki tiar u MLA u la aiti ha ka kti u rangbah shnong u Dr. Marco Mitri ha ka jingdon ryngkat u assistant rangbah shnong bah Gregorius Kharnaior, secretary shnong, seng longkmie bad kiwei ba la ai ha phyllaw jong ka ïing shnong thymmai.
Ha ba ai jingkren ha ka jingïalang u Bah PT Sawkmie u la pynpaw ka jingsngewkmen ha ba don bad ka dorbar shnong ha kane ka sngi.U MLA u pyntip ba shen un sa aiti sa ïa ka 10 lak tyngka sha ka dorbar shnong na ka bynta ban don bynta lang bad ka jingtei ïa kane ka ïing shnong.
Nalor kane, u MLA u pyntip ruh ba un sa aiti ïa ki syntek ryngkat ki tiar shet tiar tiew na ka bynta ki saw tylli ki dong kiba don hapoh shnong Kyntonmassar, ïa kaba kin lah ban pyntyllun ha ki kam dong jong ki.
Ha kane ka sngi la ïoh ruh ïa ka jingkren na u Rangbah shnong, assistant rangbah shnong, na ka nongïalam seng long kmie Kong Sukjai Swer bad na u Secretary shnong, kiba la ai khublei bad pynpaw ïa ka jingsngew nguh ïa u MLA haba ïa dei bad ki jingnoh synñiang. Hashuwa kane u Dr. Marco u ïathuh ba la plie ïa ka ïing shnong ha ka 10 tarik u Kyllalyngkot, 2022.
Haba kren shaphang u MLA, u rangbah shnong u la ong ba watla u don sha ka liang pyrshah hynrei u la pyni ïa la ka jong ka kam.U rangbah shnong u la pynkynmaw ruh ha ka ba ïa dei bad ka bylla 100 sngi ne ka job card ba u MLA u la shimkhia bha naduh ba u la jop kum u MLA.
