Khliehriat Lber 25: Ka District Basin Development Unit East Jaiñtia Hills District hynnin ka sngi ka la sam ïa ki symbai sniang, ki jingbam sniang bad ki tiar ba donkam ha shnong Umrasong, East Jaiñtia Hills District bad ki la don haduh 15 ngut ki nongshong shnong kiba la ioh jingmyntoi.
Ia kane ka jingioh jingmyntoi da ki sniang la bei tyngka da ka MSME, GOI, kaba hapoh ka North Eastern Hill programme bad la pyntreikam ïa kane ka skim da ka Incubation Centre, NEHU Tura Campus.
Haba kren ha ka jingialang, u Deputy Commissioner ka East Jaiñtia Hills District, u Abhilash Banarwal, IAS, u la pynpaw ka jingsngew kmen halor kane ka jingioh jingmyntoi ki paidbah ka District kaba long shi bynta ban kyntiew ïa ka kamai kajih jong ki, u la kyntu ruh ïa ki paidbah kiba dei ki nongrep bad kiba ri jingri ba kin wan mih sha ophis lada ki don kano kano ka jingeh bad ong ba u long la kloi ban ai ka jingiatreilang bad ki paidbah, kumta u la ong ba ki dei ban don ka jing sngew jan bad ki bor district ha kano kano ka por.
Kiba la ia don ryngkat lang ha kane ka prokram ki kynthup, u District AH & Vety Officer East Jaiñtia Hills District, u bah P.B. Nongpluh, u DPM-DBDU, u bah L. Kharkongor,bad u Waheh Shnong Umrasong, u bah Harius Tlang lem bad ka kynhun jong ka District Basin Development Unit East Jaiñtia Hills District.
