Ka jingkhlaiñ jong ka party ka dei ka jingïatreilang ki lai tylli ki kynhun: Bah Pius

Mawkyrwat, ‘Nailar, 07: U bah Pius Marweiñ uba long nongmihkhmat jong ka United Democratic Party (UDP) jong ka Ranikor Constituency ha ka jingkren ha ka jingïalang ban jied ïa ki nongkitkam ba thymmai jong ka UDP Women’s Wing jong ka Ranikor Circle u la pynpaw ba ka jingjop jong ka party dei da ka jingïatreilang jong ki lai kynhun kata naduh ki rangbah, ki samla khamtam eh ki longkmie.
U la ong shuh shuh ba ka jingmihshakhmat jong ki longkmie ka long kawei na ki bynta ban ai mynsiem ïa ka jingtreikam jong ki rangbah bad ki samla. “Lada ki longkmie, ki samla bad ki rangbah ki don ka jingïatreilang ha ki liang baroh, ngi don ka jingkyrmen ban jop da kaba suk ha kane ka elekshon 2023”, ong u bah Pius.
U la pynpaw ruh ba kum u nongmihkhmat u don ka mynsiem jong ka jingsngewshngaiñ namar da ka jingmihshakhmat jong ki longkmie ka la long ruh kawei na ki bynta jong ka jingkyrshan ïa u ha ki liang baroh namar u kheiñ ïa ki ba ki long ki kmie bad ki nongaibuid ai bor kumno ba un lah ban pyntyllun ïa ki kam nangne shakhmat. Namarkata, u la ai khublei kyrpang ïa ki longkmie bad kyrpad ruh ba ai ba kane ka mynsiem kan ïai snoh ha ki ha manla ka sngi. U la ïathuh ruh ba ha kane ka jingïalang ym dei tang ki longkmie khasi kiba wan hynrei ki don ruh ki para longkmie na ki khappud ne border naduh Maheshkola, Khonjoy, Mawpyllun, Balat, Moilam bad kiwei kiwei de kiba dei na ka Hajong bad kiwei.
Haba kren ha kaba ïa dei bad ka jingnang ïoh bor jong ka party, u bah Pius u la ong ba kumba ka paw ha ki lad pathai khubor ai ba kane ka party UDP kan sa long kawei na ki seng ka ban sa ïalam ne shynshar ïa ka sorkar lyngba ka jingdon jong ki kyrtong kiba biang bad ba don jingkyrmen ha kane ka elekshon 2023. “Ki paidbah kat shaba phai mynta ki la sdang ban phai khmat sha ka party”, ong u ba Pius bad namarkata, ka long kaba donkam ba kum ki paidbah kin long kiba trei shitom ha la ka kam.
“Shwa ka elekshon kin sa don shibun ki briew ki ban sa kynthoh da kumne da kumta ïa ki kam ba nga nga la leh bad buh jingkylli ruh ba kiei ki kam ba u u la leh na ka bynta ki paidbah, hynrei ïa kine wat sngap hynrei trei beit ïa kam da ka mynsiem jong ka jingieit bad jingkyrmen”, ong u bah Pius.
Haba kren pat na ka liang u bah G.G. Bung Snaitang, President jong ka UDP Ranikor Circle u la ong ba ka jingïatylli hapdeng ka jingbun ki jaidbynriew ka long kaba donkam haduh katta katta kumba ka long ha kine ki jaka da kaba u la ban jur ba ka jingïalong kawei ka bynta kaba donkam ha kano kano ka jingïaleh, kumba ong ka ktien, “Tylli ngin ïeng saphret ngin kyllon”. Kumta ka long kaba donkam ba kum ki rangbah, ki samla bad ki longkmie kin don ka jingïasngewthuh jingmut ha ki liang baroh khnang ba kin poi sha ka thong.
Kiwei pat ki nongkren ha kane ka sngi ki long ka kong Pretty Roi, u bah Listerning Marweiñ, Adviser jong ka UDP Women’s Wing Ranikor Circle, ka kong Lista Thongni, President jong ka UDP Womens’ Wing, South West Khasi Hills District bad kiwei de.
Ki nongkitkam jong ka UDP Women’s Wing Ranikor Circle ki long President kong Larimon Kharlartang, Vice President ki don 6 ngut kiba dei ha ki Zone, General Secretary kong Nirmaya Hajong, Joint Secretary ki don 6 ngut, Chief Women Organiser kong Kwinsila Thongni bad kong Ailamina Thongni, Deputy Women Organiser kong Biliancy Shangpliang bad kong Ieitlin Wanniang, Finance Secretary kong Mildalin Thongni bad kong Philda Syiemlieh, Adviser u bah Listerning Marweiñ lem bad kiwei dei ki nongkitkam bad ki dkhot jong ka.