Na ka NPP yn aireng u Ma Stephan na Amlarem, kyrshan u MLA barim bad san ngut ki MDC
Shillong, Nailar 06 : U MLA ba rim jongka 7- Amlarem Constituency u ma Stephan Mukhim u la rai ban ïa aireng biang ha kane ka election MLA ban long ha u 2023 kum u kyrtong jongka Nationalist Peoples Party (NPP), ïathuh u President ka NPP Amlarem Constituency u ma Het Pohthmi uba long ruh u MDC ka Warwest.
Haba ïakren bad ki nongthoh khubor ha ka Sngi Saitjain ha Amlarem, u ma Pohthmi u la ïathuh ba ki nongïalam ka NPP na Amlarem ki la dep ïa kynduh bad ïakren bad u National Vice President ka NPP uba long ruh u Symbud Myntri Rangbah ka jylla u bah Prestone Tynsong ha ka 27 tarik Naitung 2022 bad na ka liang jongu ul a pynthikna ba ka tiket kan leit beit 100 na ka 100 sha u ma Stephan Mukhim bad ïa ki kyrteng jong ki kyrtong ka party ruh kynthup ïa u ma Stephan yn sa pynbna paidbah ha u bnai Nailur mynta u snem.
Ha katei ka jingïakynduh bad ki nongthoh khubor la ïadon lang ruh u MDC ka War East u ma Gillroy Tariang lem bad ki nongïalam bad nongkyrshan ba hakhmat jong u MLA ba mynta u ma Lahkmen Rymbui.
Na ka liang u ma Pohthmi u la ïathuh ha kane ka kynti u ma Stephan u la ïoh ruh ka jingkyrshan na u MLA ba rim ka War Jaintia ( ka kyrteng jongka Constituency mynshwa bad mynta pat ka Amlarem) u ma Riang Lenon Tariang, MDC ka Congress u ma Holando Lamin nalor uwei na ki nongkyrshan ba radbah u ma Lahkmen u ma Por Pakyntein, President ka BJP Amlarem ma Everest Langstang bad kiwei kiwei.
Shuh shuh na ka liang u ma Pohthmi ula ong ba ki paidbah ki la ïohi ïa ka jingtreikam jong une u MLA ba mynta u ma Lahkmen Rymbui bad bun ki la ngiah bad ki la rai ban ai ka jingkyrshan ïa u ma Stephan. “ U ma Stephan u dei u briew uba ïohi jngai bad uba sngewethuh ïa ki jingeh jong ki paidbah. U long uba trei shitom bad uba don bha ka mynsiem ban ïarap ïa ki kup shilliang ki sem shilliang. Ngam kwah ban kynthoh ïaki kam u MLA ba mynta namar ki paidbah hi da lade ki la sakhi” ong uma Pohthmi.
Kiwei kiwei ki MDC ki ban kyrshan ïa u ma Stephan Mukhim ki long u MDCka Jowai South u ba Saron Paswet u MDC ka Sohmynting Khliehtyrshi uma Lakhon Dkhar kiba don ki nongthep vote kiba hap sha ka Amlarem Constituency.