Ki don bun ki longïing kiba khang ban dih hapdeng ka por ba dang bam bad mar ïadepam. Kaba biang bha ban dih um ka long hadien kumba 15-20 ninit hadien ba la dep ne shuwa ban bam. Kumjuh ruh ki phikir halor ka jingjied ka jait um ba ki dih, kham bunsien hi la kham jied ban dih um kaba syaid ha ka jaka ban dih da ka um kaba la buh ha refrigerator ne ka um pjah. Wat hapdeng ba dei ka aïom lyiur ruh.Kine ki jingpynpaw ki lah ban pynlyngngoh, Hynrei la kdew ba kane ka jinghikai ka dei kaba lah ban ai jingmyntoi, namar ka jingdih um syaid khamtam hadien ba la dep ban bam ka dei kaba ïarap ban pynhiar ka jingkhia. Ka umsyaid ka dei kaba ïarap ban aibor ïa ka met, ka jingpynjanai halor ka jingtylliat jingbam, ka jingtreikam hapoh ka met bad pynduna halor ka jinglum thup kiba ym lerkam kiba don hapoh ka met jongngi.
Ka jingdih umsyaid ka wallam ka jinglong dait jong ki snier, kiba ïarap halor ka jingpynmih ki jakhlia bad kiba ym lerkam shuh na ka met. Ka umpjah ha kawei pat ka liang, ka dei kaba lah ban pynduh noh kiba bun ki mineral bad long ruh ka daw halor ka jingthut ha ka rukom tylliat jingbam, khamtam lada dih hapdeng bad hadien ba la dep bam. La ju ai jingmut ba kito ki briew kiba sngewtynnad ban dih da ka umpjah kim dei ban dih hashuwa ne hadien ka 20 minit ka por bam ne ban dih lang hapdeng ba dang bam. Katba ka umsyaid pat ka dei kaba pynjanai halor ka jingtylliat jingbam bad ïarap ban pynkhuid ki jakhlia kiba don hapoh ka met. Ka umsyaid ka ïarap ban pynstet halor ka jingpynum ki jingbam. Ka jingdih da ka umpjah ha ka por bad hadien ba la dep bam ka dei ka daw ba pynlong ïa ki umphniang kiba don ha ki jingbam kin long eh bad lah ban wallam ka jinglum jong ki fat ha ki snier. Ka umsyaid ka dei kaba ïarap ruh hapdeng kito ki briew kiba don ka jingshitom kum ka jingdap lyer bad ka jingeh kpoh. Ka jinglong dap kpoh bad ka jingba ym lait kpoh ka dei kaba wanjia na ka daw ka jingduna um ka met. Ka jingpynmlien ban dih um khamtam da ka umsyaid ka ïarap ban pynkhuid kpoh bad halor ka jingtylliat jingbam, bad ïarap ïaphi ban pyllait n aka jingeh kpoh. Ka jingtreikam bha ki snier tylliat ïa ki jingbam ka long ka lynti kaba koit ba khiah halor ka jinghiar ka jingkhia, bad ka umsyaid ka dei kaba wallam ka koit ka khiah halor ka jingtylliat jingbam.
Ka jingtreikam bha hapoh ka met ruh ka don ka bynta kaba khraw halor ka jinglah ban pynhiar ka jingkhia. Ka umsyaid ka pynjur ka jinglong syaid jong ka met bad dei halor kane ka aibor ka jingtreikam hapoh ka met jongngi. Ka jingjur ka jingtreikam hapoh ka met ka iarap ban pynum bun ka calorie, kaba long ka daw halor ka jinglah ban hiar ka jingkhia. Kumjuh ruh ka jingdih umsyaid ka pynjanai halor kiwei pat ki jingtreikam kum ka jingtreikam ba don jingïadei bad ki Khyllai bad kumjuh ruh bad u Dohnud. Ka jingdih ka umsyaid ba la khem ka um sohjew ne ka sha ha ka por mynstep ka dei kaba lah ban sait pynkhuid ki jakhlia kiba don ha ka met. Bad ka jingdih shiklat ka umsyaid ha kano kano ka por, khamatm hadien ba phi la dep bam ka ïarap ban pynum kloi ka fat ba don ha ka met bad khanglad ruh halor ka jinglong lamher.
