Shillong, Nailar 04 : Ka Meghalaya ka la peitngor bha mynta na ka jingnang kiew kiba ïabit ïa ka jingpang Monkey Pox kaba pur nyngkong eh ha Kerala.
Halor kane, u Myntri Rangbah ka jylla, Conrad K Sangma u la ong ba ka sorkar jylla ka la long kaba peitngor halor kane ka jingnang bun ki briew kiba ïabit ïa katei ka jingpang. ha ka Ri.
“Ngi la long kiba la peitngor lypa halor kane ka jingpang bad lada dang donkam wat ban pynkhlaiñ shuh shuh ki jingïada, ka sorkar ka khlem pep kan sa shimkhia ban leh ïa kaba donkam,” u la ong haba kren bad ki lad pathai khubor.
Katkum ka jingong jong u, wat haba ïadei bad ka jingpang COVID ruh ka sorkar ka dang ïai bteng ban shimkhia bad bteng ïa ka jingphah test haduh mynta mynne ruh.
“Ngi dang ïai bteng ban buddien ha ka jingphah test bad ruh ïa ka jingai tika. Kumta kyllum lang ngi peitngor ha baroh ki liang,” u la bynrap biang.
