Shillong, Nailar, 04: Ka ri Khasi ka long ka ri kaba dap kyrhai da ki lum ki wah, ki khlaw ki btap bad ki maw sahnam naduh hyndai hynthai ba la pynneh pynsah da ki mynnor ha ki pateng jong ngi kiba mynta.
Wat hapdeng ka jingtyllun jong ki shalyntem ka por, ngi shem pat ba dang don ki Shnong, ki Raid bad ki Hima kiba pynneh pynsah ïa ki maw sahnam haduh kine ki sngi. Ïa kane ka jingpynsah nam la lap mynta ha ka shnong Mawlai Mawtawar, ka shnong kaba don kham pajih na ka sor jong ka shnong Mawlai kaba dang don ïa u maw uba ka shnong ka la jer kyrteng da u Maw Khongngoid.
Ki nongshong shnong jong ka shnong Mawlai Mawtawar, ki ngeit haduh mynta mynne ba une u maw u long u nongsakhi bad u nongker nongda ïa kino kino ki bor kiba nabar kiba thmu ban thombor ïa ka shnong ka thaw, na ka sniew ka smeh, na kino kino ki jingjia ba sngewsih bad ha kajuh ka por ka shnong ka ñiew ruh ïa une u maw kum u ryngkew u basa uba ker uba da ïa ka shnong ka thaw baroh kawei.
Ban pynneh pynsah ïa une u maw Khongngoid, u Chief Executive Member (CEM) jong ka Khasi Hills Autonomous District Council (KHADC) u bah Titostarwell Chyne ha ka sngi Palei u la buh ïa u mawnongrim na ka bynta ban tei da ka View Point ha kane ka jaka kaba don ïa u Maw Khongngoid khnang ban khring ïa ki nongjngohkai pyrthei namarba na kane ka jaka lah ban ïohi kyndiang ïa ka pung Umïam, ïa u Lum Shyllong bad ïa ka jingithiang jong ki sawdong sawkun jong ka mei mariang.
Ban pynurlong ïa kane ka jingangnud jong ka Dorbar Shnong, u Bah Titos Chyne u la kular ha kane ka sngi ba ka Distirct Council kan sa mang pisa T. 10 lak na ka bynta ban shna bad ban pynitynnat ïa kane ka View Point.
Ha ka jingbuh ïa u mawnongrim, la sakhi lang da u MDC jong ka Mawlai Constituency u Bah Teiborlang Pathaw uba la long kum u Symbud Kongsan, u Rangbah Shnong u Bah C. Khongkorngor lem bad kiwei kiwei de ki nongkitkam shnong.
