Nongstoiñ, Nailar 04: Naduh ba ki ar ngut ki Myntri Rangbah na Assam bad Meghalaya kata u Himanta Biswa Sarma bad u Conrad Kongal Sangma, ki la pynlong ïa ka jingïakynduh lang ha Langpih ha ka 16 tarik Naiwieng jong u snem ba la dep, ka jingpyndik jong ki briew ka sorkar Assam ha ka thaiñ Langpih ka la kham duna. Hynrei ki jingwan ban tur khah khah da ki briew ka sorkar Assam, ban thew ban woh jaka ki dang don haduh kine ki sngi.
Katkum ki tyllong khubor na ba la ïoh lum na katei ka thaiñ, la ong ba dang ha ka sngi u Blei, ki briew kiba na Assam ki la wan kiew bad ki la hiar ha kawei ka jaka kaba la tip kum ka Umsynrih kaba don hajan ka Kamakhya Madir. La ong ba ki la thew la woh ïa katei ka jaka.
La ong ruh ba uwei na kitei ki briew kiba wan thew ia katei ka jaka, u la kam ba u dei u kontraktor na Assam bad ka jingwan thew jong ki ïa katei ka jaka, ka long na ka bynta ban tei sa kawei pat ka Ktem pulit jong ka Assam. Ki heh pulit ka West Khasi Hills hadien ba ki la ïoh jingtip, ki la phah sorjamin bad la lap ïa ka jingshisha ba kitei ki briew jong ka Assam ki la wan thew ïa katei ka jaka.
La ong ruh ba ha ka jingshisha katei ka jaka kaba la wan thew da utei u kontraktor ka Assam, ka dei ka kper jong u Bines Nongbah 48 snem ka karta, u ba dei u khun jong u (L) Wo Rongrin na ka shnong Langpih bad ïa katei ka jaka jong u Bines, haduh hynriew tylli ki longïing jong ki Nepali ki la leit ban shna ïing shna sem jubor.
“Katei ka jingwan thew wan woh jong utei u kontraktor na Assam ïa katei ka jaka, ka pyni shai ba ka jingkyntu jong ki ar ngut ki Myntri Rangbah jong ki ar jylla, ba katba ym pat dep ban ïa pynbeit ïa u pud u sam u ba thikna, kam dei ban don kano kano ka jingpyntrei ïa ki skhim sorkar la ka dei na Meghalaya ne na Assam. Hynrei, lada ka long kunba long mynta ka pyni shai kdar ba ka sorkar MDA jong ka Meghalaya ka hap ban kohnguh beit katba ong ka Assam”, ong u Bah Hindro Samakha chairman ka Raidmynsaw.
