Shillong, Naitlar, 03: Ki nongtrei jong ka EMRI-108 kiba don hapoh ka shatri jong ka Meghalaya EMRI Workers Union (MEMRIWU) ki la shim ïa ka rai ban leit phai biang sha la ka kam hadien ba ka Sorkar Jylla ka la pynkut noh syndon ïa ka kontrak bad ka Kompeni GVK, ha ka sngi ba ar.
Ka jingpynkut jong ka MEMRIWU ïa ka jingïakhih kaba khlem pud sngi ka long hadien ba ka Deputy Commissioner jong ka East Khasi Hills District ka Kong Isawanda Laloo ka la khot ïakren ïa ki nongïalam jong ka Union ha ka janmiet sngi Balang.
U nongïalam jong ka Seng u Bah Josepsh Tynsong ha ka jingïakren bad ki lad pathai khubor u la ïathuh ba ka Union ka la pdiang ïa ka jingtyrwa jong ki bor synshar distrik ban pynkut noh ïa ka jingïakhih da kaba pyntip ba ka Sorkar Jylla ka la pynkut syndon ïa ka kontrak bad ka Kompeni GVK ban dang pyntyllun ïa ka jingshakri ha kane ka jylla Meghalaya.
U Bah Josepsh Tynsong u la ïathuh ba ïa ka EMRI-108 yn peit shipor da ka Deputy Commissioner bad ka tnat ka Koit ka Khiah na ka bynta lai bnai katba ka Sorkar ka dang pynkhreh ban khot tender biang na ka bynta kane ka kam ai jingshakri kaba arphew saw kynta hapoh ka jylla baroh kawei.
Kum ban shu kdew hangne, ka MEMRIWU ka la sdang ïa ka jingïakhih kaba khlem pud sngi mynta la jan 15 sngi kynthih ban dawa ïa ka Sorkar Jylla ba ka dei ban pynkut noh ïa ka jingpynjlan ïa ka kontrak bad ka kompeni GVK bad dawa ruh ba ïa ka Emergency Medical Services dei ban shimti noh da ka Sorkar.
Hynrei na ka liang jong u Myntri ka tnat ka Koit ka Khiah u James PK Sangma u la kren da kaba shai ba ka Sorkar kan ym lah satia ban shimti na ka bynta ban pynïaid hi da lade ïa ka Emergency Medical Services hynrei watla katta ruh u Myntri u la kular ban sa rah ïa kane ka jingdawa jong ka Union hakhmat ka jingïalang jong ka Kynhun Myntri ka Sorkar Jylla.
