Ka jingsdang shaid shaid ka jingïakren ïasuk hapdeng ka Sorkar Jylla, ka Sorkar Pdeng bad ka seng kieng atiar Hynñiewtrep National Liberation Council kan long ruh ka jingkut noh jong ka jingsawa ki ktang suloi hapoh ka ri Khasi bad Jaiñtia ïa kaba ki paidbah nongshong shnong ki ladep sakhi ïa ki jingjia kiba la pynsah kynmaw shirta jingim mynta kane ka seng kieng atiar ka la pynkhihwin ïa ka jylla baroh kawei ha kine ki 20 snem ba la leit noh.
Haba kyrtiang dien sha ki snem kiba la leit noh, ki nongïalam Niam ki la tyrwa ban long ki ksiang nong pynïasuk hapdeng ka Sorkar bad ka Seng HNLC hynrei kine ki jingtyrwa ki la shu kut noh kumto hapdeng kine ki 20 snem. Ka HNLC ka la pynpaw ïa ka jingtyrw ban don ka jingïakren ïasuk bad ka Sorkar Meghalaya haduh u snem 2010 bad ka Shillong Khasi Jaiñtia Church Leaders Forum ka la pynpaw ba ka long kaba kloi ban kit ha la ka tyrpeng ïa kane ka kam.
Kiba bun na ki paidbah nongshong shnong jong ka jylla ki sngew ba kane ka jingwan jong ka seng HNLC sha ka miej jingïakren kan pynkut noh ïa ki kam ïa umsnam kiba la wanrah ka jingduhei ki mynsiem briew, ka jingmynsaw jong ki briew ha ki jingjia bthei bom bapher bapher kiba la leh da kane ka seng kieng atiar.
Ki riewpawkhmat jong ka Jylla ki kren bad ki ïai kren ba ka jylla kan ïoh ïa ka shongsuk shongsaiñ tang lada ka jingsawa ki ktang suloi jong ki seng kieng atiar kan kut noh kumba ladep urlong ha rilum Garo hadien ba ka Sorkar India bad Sorkar Jylla ki ladep ïasoi ïa ka soskular ïasuk bad ka ANVC bad hadien ba la pynduh pyndam shisyndon ïa kane ka seng kieng atiar. Ym tang katta, wat ka GNLA kaba la pynking baiong shipor ïa ka tnat Pulit jong ka Jylla hynrei mynta ka shongsuk shongsaiñ ka la wan phai biang hadien ka jingshah siat ïap jong u Chairman u Sohan D. Shira.
Ka jingpdiang jong ka Sorkar India ïa ka jingtyrwa ka seng HNLC ïa ka jingïakren ïasuk ha kane ka kynti kan buh ïa ka jingkyrmen jong ka lawei ki samla naba ka Sorkar kan hap ban wad ïa ki lad ki lynti kumno ban weng ïa ka jingeh ka jong ki namarba mynta ka kynti ka kyrduh kam kyrduh jam ka dei kawei na ki jingeh kaba ki samla ki ïakynduh mawsiang.
Kane ka lynti kaba ka seng HNLC ka la shim ha kane ka kynti kan pynlong ïa ki samla kiba dang khie dang san ba ki dei ban pyrkhat da ki spah bad ki hajar sien shwa ban phet sha khlaw bad ban rah ïa ka suloi haba ki ïakynduh ïa kino kino ki jingeh namarba ka lynti jingïakren kam ym poi shano shano ruh lada ki samla kin rah suloi.
Kiba bun ki seng kieng atiar ym tang ha kane ka jylla Meghalaya hynrei wat ha kiwei pat ki jylla jong kane ka thaiñ Shatei Lammihngi ha kaba ki nongïalam jong ki seng kieng atiar ki sngewthuh ba ka lynti jong ka jingdawa kan ym poi shano shano ban phet sha khlaw lymda ki wan sha ka miej jingïakren. Kine ki dei ki nuksa kiba ladep jia naduh ki snem kiba mynshwa bad ki ban dang ïai jia ba ka suloi hi kan shu wanrah tang ïa ki jingïaum snam bad ka jingïap kaba mar kylliang bad kan ym lah satia ban wanrah ïa u soh uba ki samla ki ju angnud ban ïohi ïa ka lawei kaba phyrnai jong ka ri bad ka shnong kaba ki shong ki sah.
Mynta ka shong pat sa ha ka Sorkar kumno ban pyntyllun ïa ka jingïakren ïasuk ha ka rukom kaba dei haba ki nongïalam jong ka Seng HNLC ki la mynjur ban phah ïa ki nongïalam sha ri India da ka mynsiem ka bym don jingsuba sniew eiei namarba ka seng ka angnud beit ba ka jingïakren kan long kaba seisoh.
