Yn ïakren u CM bad u Amit Shah halor ka jingïakren iasuk bad ka HNLC
Dang pynkhreh u Ksiang ban ïakynduh ïa ka Dkhot
Shillong, Lber 24: U Myntri Rangbah ka Jylla Conrad Kongkal Sangma hynne ka sngi palei ula ong ba un sa rah ïakren bad u Myntri kam Pohïing ka Ri u Amit Shah haba ïadei bad ka mat ïakren iasuk bad ka seng Hynñiewtrep National LIberation Council (HNLC).
“Hooid, haba nga ïoh ïaka lad ha ka jingïakynduh ïa u Myntri kam Pohïing ka Ri, khlem pep, kane ka mat kan sa mih ha ka jingïakren bad ngin pyrshang ban pyntyllun shakhmat noh ïa ka kam” ong u Conrad haba ïakren bad ki nongthoh khubor.
Hynrei ula ong ba kane ka kam ka dei kaba donkam ïa bunsien ki jingïakynduh, ki jingiasyllok bad jingiatreilang.
“Haba ngi ïoh ka lad ha kano kano ka por, khlem pep ngin ïakren beit ïa kane ka kam. Ngin pyntyllun shakhmat beit ïa ka kam namar ka dei ka kam kaba jyrwit jyrwat bha kumba long ka kam pynbeit khappud” ong u Conrad.
Halor ka jingkyntu ka HNLC ban pynsangeh ïa ki jingkhynra ki Pulit pyrshah ïa ki Dkhot ka seng, u Myntri Rang bah ula ong ba hadien bala sdang ka jingïakren, ngin sa ïapeit ïa kaei kaba dei ban leh.
Haba ïakren bad u Ksiang Bah Peter S Dkhar halor ka jingïaid ka kam, ula ong “ Ngam lah satia ban ïathuh eiei halor kane namar ngam dei uba la buh da ka Sorkar ban ïathuh. Mynta te ngi dang iasdang bad tang katta nga lah ban ong”.
“Ngam pat lah ban ong lano kan (jingïakren iasuk) kan sdang..Ngi dang ïapynbiang shuwa mynta ïa ki jingdonkam baroh bad ngim pat lah ban khot ne pat lah ban leh eiei” ula bynrap.
Halor ka jingïakynduh ïa ki Nongïalam ka HNLC, une u Ksiang ula ong “Ynda dei ka por teng ngin sa ïakynduh hi…kane ka dei ka kam bala bynshet ha nga ban leh”.
Ha ka 10 tarik Rymphang 2022, ka HNLC kala phah daka shithi sha ka Sorkar Jylla ba pynpaw ïa ka jinglong ba kloi ban wan noh sha ka miej ïakren iasuk khlem kano kano ka jingbuh kyndon. Kane kala wan jia hadien ka jingkyntu jong u Myntri Rangbah ka Jylla Conrad Kongkal Sangma haba jubab ïa ka jingtyrwa jong ka HNLC lyngba ki lad pathai khubor ha ka 8 tarik Rymphang.
Na ka liang ka HNLC kala pdiang ïa ka rai jong ka Sorkar ban thung ïa u IAS bala shongthait Bah Peter S Dkhar kum u ksiang ban pyntyllun shakhmat ïa ka jingïakren iasuk.