Shillong, Nailar, 02: Ka District Magistrate jong ka East Khasi Hills District ka la pynjari da ka hukum hapoh ka Section 144 CrPC kaba mana ban die ïa ki tiar ba nep, kum ki wait, ki tari bad kiwei kiwei ha ki jaka ïaid paidbah bad ha shilynter ka surok ha Police Bazaar bad ha Jail Road, Shillong. Ïa kine ki tiar banep lah ban die tang hapoh ka dukan ba la buh bha sha ka jaka ba lah ban ïohi.
Kane ka hukum kan treikam noh mardor tad haduh ban da pynbna da kumwei pat.
Ka jingpynjari ïa kane ka hukum ka long hadien ba la ïoh jingtip ba ki don katto katne ki nongdie madan kiba die ïa ki tiar banep, kum ki wait, ki tari bad kiwei kiwei ha shilynter ka surok ha Police Bazaar bad ha Jail Road, Shillong.
Ka jingdie ha ki jaka paidbah ïa kine ki tiar banep ka lah ban buh jingma naba ki riewbymman ki lah ban shim kynthet ha kano ma kano ka por ban pynmynsaw ïa ki nongshong dukan lane ïa ki nongïaid lynti.
