Shillong, Lber, 23: Ka Mawbyrne Lower Primary School ha ka sngi Palei ka la rakhe ïa ka Jubili Rupa ha ka jingïaid lynti ban ai jingshakri sha ki khynnah ha kane ka shnong ha ka thoh ka pule.
Ki bor pynïaid skul kim lah khlem da kyrtiang dien ïa u synñiang u bynhei jong ki radbah kiba la noh sha u sup u thiar ban pynlong ïa ka skul naduh ba la seng kumba ka long mynta, kata, u Bah Peter rynjah bad i Kong Dapmon Pala (bam kwai ha dwar u Blei bad i S. Herington Mylliemngap.
“Ngi long kumne kumba ngi long mynta dei na ka jinglen lade jong ine ki rangbah bad kumjuh ruh ka mynsiem jingïatreilang na ki bor Sorkar kum na ka ophis u Block Development Officer (BDO) ka Pynursla C&RD Block. Hooid, ngim lah ruh khlem da ñiew tang ïa u MLA barim ka Nongskhen constituency u Bah KK. Dkhar bad ïa u Deputy Inspector of School barim u Bah Phini Ryngksai kiba la sei lut la ka buit ka bor ban pynlong ïa ka L.P School Mawbyrne kaba kiew irat,” ong u kyrwoh ba la phah da u Secretary ka Celebration Committee jong ka Skul.
“Shuh shuh, khlem da lah ruh ban klet ïa kiwei pat kiba la noh ïa u synñiang u bynhei kiba ngim lah shuh ban pynpaw kyrteng ïa ki, ngin ai lang ïa phi kajuh ka jingsngewnguh bad ka jingsngewburom khlem da lah ban pynpaw kyrteng. Ym tang katta ki don ruh kiba aiti met bad mynsiem sha ka skul jong ngi kiba dang don bad kiba lah khlad ruh,” ong u kyrwoh.
Ka Committee lem bad ka KSU Pynursla Unit ki pynpaw ruh ka jingsngewnguh ïa u President barim jong ka KSU u Bah Paul Lyngdoh uba la plie paidbah ïa kane ka skul ha u snem 1997 bad kumjuh ruh ïa ki nongïalam ka KSU kiba kynthup ïa u Bah Reyonald Kharkamni bad ïa u Bah Danny Nongsiej.
“Nangne shakhmat ngin sa pynlong ïa ki prokram rakhe bapher bapher bad ngin sa lum synñiang ruh na ka bynta kane ka jingrakhe ban khylliap lama ïa ka jingdap 25 snem jong ka skul,” la ong u kyrwoh.
“Ka Committee ryngkat bad ka KSU ngi maham tyngeh ïa kino kino ki nongshim kabu ïa ka jinglum synniang na bynta kane ka jingrakhe jong ngi ha ka kyteng jong ka skul. Lada lap ïa kino kino kiba leh pyrshah ngin sa leh ïa kaba donkam. Ngi kyrpad ruh ïa ki nong synniang kiba ju don ryngkat bad ngi ba kim dei ban ai klumar ïa u synñiang khlem ka muhor na u Finance Secretary jong ka KSU Pynursla Unit lane khlem ka muhor na u Finance Secretary/Chairman jong ka Celebration Committee,” ong shuh shuh u kyrwoh.
