Shillong, Lber, 23: U Myntri ka tnat ka Koit ka Khiah ka Sorkar Jylla u James PK Sangma ha ka sngi Palei u la pyntip ba ka jingsahteng ban tei ïa ka Shillong Medical College ka dei na ka daw ba ka Sorkar ka la hap ban pyndam noh ïa ka jingïasoi soskular bad ka KPC ka kompeni ba la aiti ban pyntrei ïa kane ka College ha New Shillong Township.
Ha ka jingïakren bad ki lad pathai khubor, u James Sangma u la ong, “ka Sorkar haduh mynta ka dang bishar. Ka jingsahteng ban shna ïa ka Shillong Medical College ka dei na kiba bun ki daw ki bym lah ban kiar. Ka jingïapynbeit bad ka Kompeni ba la bynshet ban pyntrei ïa kane ka College kam shym la poi shaei shaei ruh bad dei na kane ka daw ba ka Sorkar ka la rai ban weng noh ïa ka jingïasoi soskular bad kane ka Kompeni.”
Haba kylli, une u Myntri ka tnat ka Koit ka Khiah u la pyntip ba ka Sorkar Jylla kan sa khot paidbah noh da kiwei pat ki kompeni ban ïoh pynsdang noh shaid shaid ïa ka jingtei ïa ka Shillong Medical College.
U la ïathuh ruh kumba ka long mynta ka jingshna ïa ka Medical College ha Tura ka la ïaid shaid shaid.
Dang ha kine ki khyndiat sngi ki nongïalam jong ka Khasi Students Union (KSU) hapoh ka jingïalam jong u President u samla Lambokstarwell Marngar ki la leit ban ïakynduh markhmat bad u James PK Sangma ban pan jingpynshai halor ka jingsahteng ban tei ïa ka Shillong Medical College.
Kane ka jingbuddien jong ka Seng halor kane ka College ka long hadien ba la ïohi lyngba ki lad pathai khubor ba ka Sorkar ka la rai ban pyndam noh ïa ka soskular bad ka kompani ba la aiti ban tei ïa kane ka College.
Ha u Nailur, 2021, ka KSU ka la aiti da ka jingthoh sha u Bah Prestone Tynsong mynba u dang long u Myntri uba peit ïa ka tnat ka Koit ka Khiah na ka bynta ban pan jingshai halor ka jingsahteng ban shna ïa ka Shillong Medical College kaba pynskhem ha u snem 2017 ha Reid Chest TB Hospital ha Mawprem.
Ka Seng ka la buh jingkylli ruh halor ka jingaiti sha ka kompeni KPC ban tei ïa kane ka College kaba la don dak sniew ha kiba bun ki jaka.
Kum ban pynkynmaw, ïa kane ka College la pynkynriah noh na Mawprem sha Umsawli, New Shillong Tonwship namar ka jingrit palat ka jaka ha Mawprem bad ka bym ïahap satia bad ki kyndon jong ka Medical Council of India.
Ha kaba ïadei bad kane, u James Sangma u la ong ba wat ka jaka ha Umsawli kaba don tang 17 akar ruh ka dang rit palat, hynrei watla katta u la ong ba un sa ïasyllok bad kiwei ki Myntri Sorkar ba lada long yn pynkynriah noh sha kawei ka jaka kum ha Mawpdang kaba hap hi hapoh ka New Shillong Township.
Ka KSU ka la ban jur ïa u James Sangma ban ïaleh katlah katïai ban pynurlong noh kham kloi ïa ka jingtei ïa ka Shillong Medical College khnang ba kan long ka jingmyntoi kaba khraw ïa ki samla pule jong kane ka jylla Meghalaya khamtam ïa kito ki samla pule kiba wan na ki longiing ba kham duna ka ïoh ka kot bad ki bym kotbor ban leit pule shabar ka jylla.
