Pynlong Screening camp ha Khliehriat na ka bynta kito kiba don jingduna ha ki dkhot met

Khliehriat Lber 24: Ha ryngkat ka jingiatreilang bad ki Society, ki Organisation bapher bapher, ka ophis u Deputy Commissioner East Jaintia Hills District mynta ka sngi ka la pynlong ïa ka Screening Camp kaba kyrpang ha Jaiñtia Eastern College Khliehriat West, ha kaba yn bishar bniah bha ia baroh kito kiba don jingduna ha ki dkhot met khang ban dup lah ban theh ki jingiarap shaki ki ban long ka jingmyntoi ïa ki, ïa kane ka prokram la bei tyngka da ka State Resource Center, Shillong.
Haba kren kum u kongsan ha kane ka sngi, u myntri ka sorkar jylla u ba dei ruh u MLA jong ka Khliehriat, u bah Kyrmen Shylla, u la kyntu bad ai jingmut ba kan bha ban thaw noh da ki Self Help Group kaba na ka bynta kito kiba don jingduna ha ki dkhot met, ha kaba ki lad jingiarap, kum ki skim sorkar bad kiwei kiwei ki lad ioh jingmyntoi kin wan lyngba lyngba ki SHG ki ban long na ka bynta ban kyntiew ïa ki ba don jingduna ha ki dkhot met, u la ai ka jingiaroh ïa ka Ephphatha Society kaba na Dkhiah bad kumjuh ruh ïa ka Kyrmen Foundation kiba la lah ban leh ïa ki kam kiba radbah na ka bynta kiba don jingduna ha ki dkhot met bad ong ruh ba ha kane ka kynti ka Ephphatha Society bad ka Kyrmen Foundation ki la lah ban saiñdur ïa ka skul kaba na ka bynta kito kiba don jingduba ha ki dkhot met bad kane ka skul kan sa plie noh shen.
U la ai ka jingkhublei kyrpang ïa ki nongialam bad ki dkhot jong ka Ephphatha Society bad kumjuh ruh ïa u President jong ka Kyrmen Foundation u bah Forness Dkhar bad ka Secretary, ka kong Semi Khongthiang kiba la iohi jngai ha kaba ki la long bunsien kiba la kloi ban iarap ïa ki paidbah kiba donkam shisha ïa ka jingiarap, u la ai ka jingkitbok ktrwaing ba kin nang lah ban trei kham bha shuh shuh na ka bynta ka bha ka mait ha ka im lang ka sah lang.
U Deputy Commissioner ka East Jaiñtia Hills District, u Abhilash Banarwal, IAS, u la ong ba ka dei ka kamram jong u kum u khlieh ka district ban don ka jingkitkhlieh na ka bynta kiba don jingduna ha ki dkhot met kiba don hapoh ka district bad ban peit ruh ïa kiwei kiwei ki jingdonkam hapoh ka district, u ka khublei ïa kine ki Society bad ki Organisation kiba ka ai ka jingiatreilang ban kynyiew ïa kiba don jungduna ha ki dkhot met.
U President jong ka Kyrmen Foundation, u bah Fourness Dkhar, u la iathuh ba kane Kyrmen Foundation ka dang don shibun ki jingthmu kiba yn sa nang pyndep kiba na ka bynta kiba don jingduna ha ki dkhot met ha kaba kane ka jingpynrung kyrteng ha kane ka Camp mynta ka sngi ka dang dei tang ka jingsdang, la ong ruh ba ka Ephohatha society ha ryngkat ka jingiatreilang bad ka Kyrmen Foundantion ka la sdang ban plie ïa ka skul hapoh ka district kaba kyrpang tang na ka bynta kito kiba don jingduna ha ki dkhot met, kumta kane ka Camp ba la pynlong mynta ka sngi ruh ka long kum ka lad ban pyntip sha baroh ki kmie ki kpa kiba don ki khun kiba don jingduna ha ki dkhot met ba kane ka skul kan sa plie noh shen bad ba kin phah ïa ki khun jong ki ban pule ha kane ka skul.
U Convener, SAKSHAM, Governing Council Member NILD, Kolkata, u Mithun Roy, u la iathuh ba kine ki don ruh ka sap kaba kyrpang bha, na kata ka daw ki don ka jingpher kaba kyrpang, u la kyntu ba ym dei ban shu set kut ïa ki hapoh ïing, ym dei ban pynlong ïa ki kum kito ki koidi hala ïing.
Haba kren shaphang ka jinglah jong kito kiba don jingduna ha ki dkhot met, u Mithun Roy u la iathuh ba ka Organisation jong u ka la jied ïa ki briew kiba 17 snem shaneng kiba don jingdon jingduna ha ki dkhot met bad la pynrung kam ïa ki ha ki 5-Star Hotel, ki trei ïa ki kam khoh ïa ki piat ki rynsun bad ki ioh tulp haduh T20,000 hajar tyngka shi bnai, kumta kum kine ki jingpyrkhat ki dei kiba wanrah jingkylla ha ka im lang ka sah lang, u la iathuh ruh ba ka Organisation ka la pynlong ïa kiba bun tylli ki camp ha ki jaka bapher bapher.
Kiba la ai jingkren ki kynthup ruh, u EAC East Jaiñtia Hills, u bah S.Marwein, ka District Social Welfare Officer, East Jaintia Hills District, ka kong R.Pasah, ïa ka jingialang la pyniaid da u Supervisor Social Welfare East Jaiñtia Hills District, u bah Patrick Dkhar.