Pynshai u Bah Prestone ba dei namar ba nga buh jingkylli ïa ka jingïakhih ha ka por eksam
Hadien ba phriang ki khubor ba beiñ nonghikai
Shillong, Naiwieng 18 : U Symbud Myntri Rangbah ka Jylla, Bah Prestone Tynsong ha ka sngi Balang u la pynshai ba ki jingkren jong u kiba phriang kylleng pyrshah ïa ki nonghikai kam dei satia kaba u thmu ïa baroh ki nonghikai hynrei ka dei namar ka jingsngewkhia halor ka jingkhot ïakhih jong ki nonghikai ha ka por ba ki khynnah ki don ïa ka eksam kutsnem.
Haba kren bad ki lad pathai khubor, U Bah Prestone u la ong, “Ki nonghikai ki dei kiba don ïa bynta kaba khraw ban tei ïa ka lawei jong ki pateng ban wan bad ngam don kano kano ka jingthmu ban pynjah burom ïa ki.”
Shuh shuh u ong ba ka jingkren jong u ka long ban buh jingkylli ïa ki nongïalam jong ka KJDSTA halor ka jingkhot ïakhih ïa ki nonghikai ban mih madan ban ïakhih ha ka por ba ki khynnah skul ki dang pynkhreh ïa ki eksamin.
Ïa kane, u Bah Prestone u la ïathuh ba u la kren ha ka jingïalang plie ïa ka centre thoh eksam ha kaba u la ïaroh ai ki nonghikai kiba la aiti met bad mynsiem na ka bynta ka bit ka biang jong ki khynnah skul watla ki ïoh tang kumba 10,000 tyngka ka tulop shi bnai.
“Ha kato ka sngi nga ong, isynei ïa ki nonghikai kiba ïoh tang T.10,000 ka tulop hynrei ki aiti met bad mynsiem ban trei shitom na ka bynta ki khynnah,” u la ong.
U la kynnoh ba don katto-katne kiba la shim tang shi bynta na ka jingkren jong u bad pynsaphriang ïa ki jingkynthoh ha ki rynsan social media, kaba la pynmih ïa ka jingsngewthuh bakla.
“Ki nonghikai ki don ka hok ban dawa ïa ki hok jong ki bad ban pynpaw ïa ki jingeh kiba ki ïakynduh. Hynrei, kum ki nongïalam ki dei ban pyrkhat lem ïa ka jingeh jong ki khynnah skul bad ki kmie ki kpa. Ki kmie ki kpa ki kwah ban ïohi ba ki khun jong ki kin leh bha ïa ka eksam kut snem. Balei phim pyrkhat lem ïa ka jingsngewkhia jong ki kmie ki kpa bad ki khynnah skul?” u la kylli.
U Bah Prestone u la kyntu ruh ïa ki nongïalam ba kin ailad shwa ïa ka eksam kut snem haduh ba kan da kut bad hadien kata ki lah ban bteng biang ïa ka jingïakhih jong ki. “Ai shwa ba ki eksam kin ïaid beit,” u la ong.
Haba kdew ïa ka eksam Secondary School Leaving Certificate (SSLC) kaban long ha ka 04tarik Nohprah mynta u snem, u Bah Prestone u la pynpaw ïa ka jingsngewkhia ïoh ba kane ka jingïakhih kan ktah wat ïa kane ka eksam ruh kaban buh ka jingeh kaba khraw pat ïa ki kmie ki kpa jong ki khynnah skul ha kylleng ka jylla.
Na ka liang u Bah Prestone haba jubab halor ka jingkylli kumno pat ki skul ki pynïaid shakhmat ïa ka eksam kut snem, u la ïathuh ba ïa mynta shipor don ki skul ba ki Managing Committee ki pynïaid hi ïa ka eksam kut snem katkum ka tarik ba la buh.
Shuh shuh u ong ruh ba ka sorkar ka dang ïakren mynta ban pyntikna ba kan ym don ka jingthut ha ka jingpynlong ïa ka eksam kut snem jong ki khynnah na ka por ba la buh.
“Ka jingiehnoh jongphi ïa ka kamram, kam ktah tang ïa ka Sorkar, hynrei ka ktah khamtam ïa ki khynnah skul bad ki kmie ki kpa kiba kwah ban ïohi ba ki khun kin pass bha ha ka eksam kut snem,” u la ong.
Ha kajuh ka por haba pynshai pat halor ka jingdawa jong ki nonghikai Deficit kiba ïakhih mynta, u Symbud Myntri Rangbah u la ong ba ki nonghikai kin ym duh ïa ka hok ban ïoh ïa kine ki jingsiew kiba dang sah. U la ong ba katkum ka jingtip na ka Directorate of School Education and Literacy, ki sienjam ban pynbeit bad ban pyndep ïa kine ki jingsiew ki dang ïaid shakhmat.
Katkum ka jingïathuh jong u Symbud Myntri Rangbah ki la don haduh 6902 ngut ki nonghikai Deficit ha ki 2194 tylli ki skul naduh ki lower Primary haduh ki kyrdan pule kiba shajrong.