Kob ka VPP ban jop kham bun vote mynta ban ïa ka elekshon MP ba ladep
Shillong, Naiwieng 18 : Ka Voice of the People Party (VPP) ka la kob ba ki don ka jingkyrmen ba kin jop kham bun vote ha kane ka elekshon MP shiteng samoi ban ïa ka elekshon MP lyngba ka jingkyrshan bad ka jingshaniah kaba ki paidbah ki pynpaw ha man la ki rynsan ïalap elekshon.
Haba pynpaw ïa kane, u President ka party, Bah Ardent Miller Basaïawmoit u la ïathuh ruh ba ka party ka la pynkhreh pura na bynta kane ka elekshon shiteng samoi watla kim pat tip ïa ka tarik lano yn pynlong ïa ka elekshon.
“Ngi don ka jingshaniah ba ki paidbah ki dang don ryngkat bad ngi bad ki ruh ki dang shaniah ha ka VPP. Ngi khmih lynti ba ngin jop da ka jingïoh vote kaba kham heh ban ïa kaba ngi la jop ha ka elekshon MP kaba la dep,” u la ong ha ka jingïakren bad ki lad pathai khubor ha kane ka sngi Balang.
Nangta haba kren halor ka jingkam jong kiwei ki party ba ka VPP ka la nang duh ka jingshaniah jong ki paidbah, u Bah Ardent u la ong ba kadei ka kamram jong ki ban kren kumta namar kin ym lah ban kubur ne mynjur lang bad ka VPP ka la nang ïohbor katba nang ïaid ka por.