Tang jong ka East Khasi Hills : 16 tylli ki Dorbar Shnong kiba ladep ban shong jingïalang bad ka TFC halor ki kyndon ka MRSSA
Shillong, Naiwieng 18: Ka Federation of Khasi Jaintia and Garo People (FKJGP) seng kmie mynta ka sngi kala leit ban kynduh ïa u Deputy Commissioner ka East Khasi Hills halor ka Task Force Committee kaba hap hapoh ka Meghalaya Residents Safety and Security Act (MRRSA) ban ioh ïa ka jingtip ba tikna.
Haba kren bad ki lad pathai khubor u Bah Dundee C Khongsit uba dei u President ka seng u la ong, ngi la pan jingshai ba katno sien kane ka task force kaba shong jingialang bad ruh ba kumno ki Dorbar Shnong ha kaba iadei bad ki kyndon kiba la don hapoh ka MRSSA ba ki dorbar shnong kidei ban pynrung kyrteng ïa ki nong shongwai bat ban ai jingtip pat sha ka Task Force Committee.
U Bah Dundee u la ong, Ngi la ioh ban ïa kren bad u DC namar ka jingsngewkhia jong ka seng ka long na ka por sha ka por namar ba bunsien ngi iohi ha ka jingtyngkhuh jong ki dkhot ka seng ha ka por ba leh ïa ka jingpynrung kyrteng na ka bynta ka EPIC bad ngi lap ruh ba ki don ki briew kiba artatien kiba ym dei ki nong shong shnong jong ngi, hynrei tang namar ba ki lah ban wanrah ïa ki kot ki sla bad ioh plie account ha ki bank bapher bapher ki ioh ban pynrung ïa lade ha ka thup ki nongthep vote.
“Ngi ïa kren bad u DC bad ka jingpyntrei kam ïa ka Task Force Committee bad ka jingbthah ïa ki Dorbar Shnong ba kin peit, khnang bashisien la pyntrei kam ïa kane ka Committee ka lah bthah ïa ki Dorbar Shnong bapher bapher ki hap hap ban long adkar ban shim klumar ban pynrung kyrteng ïa ki nong shong wai bad ki hap ban peit bniah bha na kino ki jylla ki wan” u la ong.
Shuh shuh u Bah Dundee u la ong ha East Khasi Hills yn don ki Entrey bad Exit Point ne ka jingrung bad ka jingmih ki briew ba nabar te na ka liang u DC u la ïathuh ba ba ki don kumba 16 tylli ki Dorbar Shnong kiba la dep ïa shong bad u DC.
Na ka liang jong ki bor pyniaid jong ka District kila bthah ïa ki kaei ba kin leh, te hynrei haduh mynta mynne ka dang long duna bha ba kin leh na ki Dorbar Shnong kiba lah ban shong bad ka Committee, u la ong.
“Ngi la ai jingmut ha u DC lada long kaba na ka por sha ka por bad khamtam eh ha ki Dorbar ba shong khleh kiba don ha East Khasi Hills dei ban kham ban jur bha bad ban pynbor ïa ki Dorbar Shnong ba kidei ban leh ïa ka kam ba dei ban leh” ong u Bah Dundee.
Kumba long mynta bunsien na ka liang u DC u la ong ba ka long kaba eh ban pyntrei kam ïa kane ka kyndon jong ka MRSSA ha ki shnong jong ki namar ba ki donkam briew katkum ka juk mymta da ki Data Operator ba na ka liang u DC bad ka sorkar ki dang thaw ki lad ki lynti ban pynbeit ïa kane jingeh, u la ong.
Shuh shuh u Bah Dundee u la ong ba ka seng ka shu kwah ban kyntu ïa ki Dorbar Shnong ba ban lait na ki jingdkoh ka kam nai ap than ban da ioh kita ki kor computer hynrei lyngba ki register ki lah ruh pynrung kyrteng ïa ki nongwan shongwai khamtam eh ïa ki briew kiba nabar.