Kynduh ka KSU ïa u JE ka MePDCL : Ba lip khah khah ka bording kaba wanrah jingeh ïa ki samla pule
Shillong, Naiwieng 18: Ka Khasi Students’ Union (KSU), Upper Shillong Circle, hapoh ka jingïalam jong u Samla Mankhrawbok Marbaniang, Organising Secretary jong ka Circle, ryngkat bad kiwei pat ki nongïalam, mynta ka sngi, 18 tarik u Naiwieng 2026, ka la leit ban ïakynduh ïa u Junior Engineer jong ka MePDCL, Upper Shillong Distribution Sub-Division, ban aiti da ka dorkhas bad ban pynsngew halor ka jingeh kaba ki paidbah nongshong shnong ka thaiñ Upper Shillong ki la mad na ka daw jong ka jinglip khah-khah jong ka bording ha kine ki sngi ba la dep.
Ha kane ka jingïakynduh, ka Seng ka la pynpaw ïa ka jingsngewkhia kaba khraw halor kane ka jinglong jingman, namar ba ka jinglip bording khah-khah ka la ktah shibun ïa ki paidbah nongshong shnong, khamtam eh ïa ki khun samla kiba dang pynkhreh ïa ki eksamin bapher-bapher.Kane ka jingthut jong ka jingsam bording ka wanrah ïa ki jingeh ha ka jingpule bad ka jingpyndep ïa ki kam ki jam jong ki ha ka sngi bad ha ka miet.
Halor kane, ka Seng ka la kyntu jur ïa ka tnad MePDCL ba kan shimkhia mardor ïa kane ka kam bad ban wad ïa ki lad ki lynti kiba biang ban pynbeit bad ban weng noh ïa kane ka jingeh, khnang ba ki khun samla bad ki paidbah nongshong shnong hi baroh kin lait na ka jingshah ktah na kane ka jingthut jong ka jingsam bording, bad kin lah ban bteng ïa ki kam ki jam jong ki khlem kano-kano ka jingwit.
Ha kajuh ka por, u Junior Engineer jong ka MePDCL, Upper Shillong Distribution Sub-Division, u la kular ban shim khia halor kane ka jingeh bad ban peit bniah ïa ka jingeh kaba la pynsngew da ka Seng.