Ki paidbah ki ap sa tang ka por ban ai ïa ka jubab ïa ki MLA ba kyntiap seng: President VPP

0

Shillong, Naiwieng 18 : U President ka Voice of the People Party (VPP), Bah Ardent Miller Basaiawmoit ha ka sngi Balang u la ong ba ki paidbah nongthep vote ka jylla mynta ki ap beit kmang sa tang ia ka por ba kin ai noh ia ka jubab ïa kito ki MLA kiba kyntiap noh na kawei ka party sha kawei pat.
Da kaba kyntait ban kren jrong halor ka jingpynïasoh jong ki phra ngut ki MLA ka United Democratic Party (UDP) sha ka Bharatiya Janata Party (BJP), u Bah Ardent u la ong ba um kwah ban pynpaw kano kano ka jingkynthoh halor katei ka sienjam ba la shim da ki nongmihkhmat paidbah.
Tangba u ong pat ba ki paidbah nongthep vote mynta ki la kham stad, kham sngewthuh bad kham tip shaphang ki kam saiñ pyrthei. Kumta, katkum ka jingsngew jong u, ki paidbah kin ym pdiang suk ïa kum kine ki jingleh jong ki.
“Namarkata, ngi shu ap ïa ka por. Ha ka por kaba dei bad kaba biang, ki paidbah kin jubab bad pyni ïa ka jingsngew jong ki halor kum kine ki sienjam ba shim da ki nongïalam saiñ pyrthei,” u la ong.
Ha kajuh ka por u Bah Ardent u la kyntait ruh ban kren ei ei haduh katno ka BJP ka lah ban leh bha ha ka elekshon MLA kaban long ha u snem 2028. U la shu ong ba kane hi khatduh kan dei ka rai jong u paidbha ban bishar bad shim ïa ka rai kaba khatduh.

Leave A Reply

Your email address will not be published.