Ka jingphet seng jong ki MLA ka UDP kan ym ktah satia ïa ka Mairang Konstitwensi

0

Mairang, Naiwieng 17: Ka United Democratic Party kawei na ki seng saiñpythei riewlum kaba don haduh khatar ngut ki MLA ka la kylla long ka seng riewlum kaba rit tam na mar phra ngut na ki MLA jong ka ki la leit pynïasoh noh bad ka Bharatya Janata Party kaba ïalam ïa ka sorkar NDA ha ka ri India katba laingut kiwei pat ki la leit pynïasoh noh bad ka National Peoples party kaba bat ïa ka bor synshar ha ka jylla bad mynta sah satang u bah Metbah Lyngdoh MLA ka Mairang uba bat ruh kum u Myntri ka tnad bording ha ka sorkar jylla hynrei uba la iehnoh kam noh hadien ka jing phet noh jong ki khatwei ngut ki MLA.
Ka jingsah marwei jong u bah Metbah Lyngdoh ha ka UDP ka la pynlong ïa ki paitbah ba bun ba lang ba kin kren beiñ ïa u da kaba kynnoh da kumne da kumtai hynrei kitei kiba kren beiñ kim dei satia ki nongshong shnong na ka Mairang constituency. Haba pyrshang ban twad jingmut na ki paitbah nongshong shnong ka Mairang constituency na ka liang ki nongshong shnong bad ki riew rangbah ki la ong ba wat la u bah Metbah Lyngdoh u sah marwei kum u president ruh ka jingiehnoh jong u ïa ka shuki Myntri sorkar ka pyni ba u kham ieit ï ki paitbah ka constituency ban ïa ka shuki Myntri. Ki la ong ruh ba ym lah ban len ïa ka jingshisha ba ki nongmihkhmat kiba ieit shuki ki dei kito kiba la phet noh na ka party sha kiwei pat bad ka jingkynrup pynsted jong u bah Paul Lyngdoh ïa ka shuki ka sakhi shai kdar bad ka pynshisha ba u kham ieit ïa ka shuki ban ïa ki paitbah ka cponstituency.
Nalor kata ki la ong ruh ba jin lada u bah Metbah Lyngdoh um iehnoh ïa ka shuki Myntri u Conrad Konmgal Sangma Myntri Rangbah ka jylla un ym pynhap satia ïa u bah Metbah Lyngdoh na ka shuki.
Ha kaba ïadei bad ka Ealection MLA ha u snem 2028 ki paitbah nongshong shnong ka Mairang constituency ki la ong ba lada u bah Metbah Lyngdoh un dang ïaleh biang ïa ka Election ki paitbah kin ym kynriah satia bad wat naduh kine ki sngi ruh ki la sdang ban pynsgewthuh ïa ki paitbah haman la ki jaka ba kim dei satia ban kynriah lane kim dei ban shah ïalam bakla ha kiwei pat ki seng saiñpyrthei kiba heh tang ka nia ha surok hynrei kim ju poi ha ka thong ia kano kano ka bynta ba ki pyrshang ban leh.
Ha kajuh ka por ki la ong ba ka jingneh jingmut jong u bah Metbah Lyngdoh bad ka jingïengskhem jong u ha ka party ka long thik kumba u (L) Bah Hopingstone Lyngdoh um kynriah na ka HSPDP haduh ba un da khlad noh bad ki la pynkynmaw ruh ba ka jingsah marwei jong u (L) bah Hopingstone Lyngdoh ha ka party kam dei na kano kano ka daw hynrei ka dei na ka jingphet noh jong ki MLA sha kiwei pat ki party kumba phet ki MLA ka UDP ha kane ka kynti.
Ha kajuh ka por ki la ong ba lada ki khatarngut ki MLA kiba la phet noh na ka UDP sha kiwei pat ki party kin ïaleh election biang ha u snem 2028 kin sa peit kai katno ngut eh ki ban dang jop bad yn ym don jingaratatien ba na ki khatar ngut lehse tang san ngut ruh kin ym jop shuh.

Leave A Reply

Your email address will not be published.