Halor ki Samla bad ka ïoh ka kot, mih ïakhun u Damewanhi na Khliehriat

Shillong, Nailar 01: Lehse ym don ba poi pyrkhat ba na ka Constituency kaba ki briew ki ïakren ïa ka lak bad ka klur yn mih lympung saiñpyrthei, u kyrtong u ban ong, “Ngam nym ai pisa satia”.
Une udei u Samla Rangbah Damewanhi Rymbai, 35 snem ka rta, na Wapung Skur, uba la mih madan ban ïa ai reng pyrshah ïa ki arngut ki heh spah, kata u Samla Kyrmen Shylla, MLA bad Myntri ka sorkar jylla bad u Bah Nehlang Lyngdoh, MLA bad Myntri barim ka jylla.
“Ngan long kum u David ban ïakhun pyrshah ïa ki 2 ngut ki Goliath”, la ong u Damewanhi haba ïakren dang shen bad ki nongthoh khubor.
Haba la kylli kaei ka daw kaba u mih sha kane ka lympung saiñpyrthei, u President barim ka Jaiñtia Youth Federation (JYF) u la ong ba ka daw ba kongsan kadei namar ka jinghiar ka ïoh ka kot jong ki paidbah ha Khliehriat Constituency, ïa kaba lehse kiba nabar kim da tip ne sngewthuh eh kumno kane ka jaka ba bun dewïong kan hiar ka ïoh ka kot.
“Ha Khliehriat, ka jingtih dewïong ka pynriewspah tang ïa ki katto katne, khamtam lei lei haba la wan ka jingkhang tih da ka NGT naduh u snem 2014”, u la ong, da kaba bynrap ba kiba riewspah ki la nang riewspah bad kiba duk ki la nang duk, kaba mut ba ka spah ka shong shiliang ha kane ka thaiñ jong u.
U la ïathuh ba dei hadien ba u la ïakynduh ïa kiba bun ki paidbah kiba duk kiba la ud la nam namar ka jinghiar jong ka ïoh ka kot bad kamai kajih namar ka jingkhang tih dewïong bad ka jingïoh lad tang ki katto katne ban khaïi dewïong da kaba shu khaïi beaiñ ba u la rai ban mih shakhmat ban ïaleh na ka bynta ka hok jong ki.
U la ïathuh ruh ba kiba bun ki Samla kiba la nang la stad ha East Jaiñtia Hills bad khamtam ha Khliehriat mynta ki la sngewthuh ïa kane ka jinghiar ka ïoh ka kot, ha kaba kiba bun kiba leit pule shabar jylla kiba la wan phai noh sha jylla na ka jingkhang dam ha u snem 2020 namar ka jingpang COVID 19 kim shym la leit phai shuh, namar ba ki kmie ki kpa kim lah kyrshan shuh ïa ki haba la hiar ka kamai kajih jong ki.
“Kine ki samla mynta ki la sngewthuh ba kumno ka jingbym lah treikam bha jong ka sorkar bad khamtam u nongmihkhmat jong ki, ki la wan sha nga ban ïaphylliew jingmut bad ïasyllok”, la ong une u Samla Rangbah.
Ha kajuh ka por, u la ong ruh ba ki paidbah na Khliehriat, ki la khmih lynti ba ka jingwan ka District thymmai la ka jong ha kine ki snem baladep, kan wanrah bun ki jingmyntoi ïa ki paidbah bad khamtam ïa ki Samla ha ka liang ka ïoh kam ïoh jam, hynrei kam shym la long kumba ki khmih lynti. U la ong ruh ba u Bah Kyrmen udei u briew uba ieit ïa ki jingïalehkai Sports, hynrei um shym la lah pat ban kyntiew ïa ka jingïalehkai Sports lane wat ïa ki jaka ïalehkai ruh kiba bun ki bym pat biang.
Nalorkata u Bah Damewanhi u la ong ruh ba kiba bun ki Nongïalam Shnong kidei kiba ha ka rta kum ma u bad ma ki ruh bun ki la sngewthuh ïa ka jingdonkam ka jingkylla ha ka Constituency jong ki.