Shillong, Naiwieng 14: U Lamphang jong ka Meghalaya Legislative Assembly, u Thomas A. Sangma, ha ryngkat bad ka kynhun ki nongmih khmat ka jylla Meghalaya kila leit ban iuh kjat ïa ka ïing u Dr. B. R. Ambedkar ha King Henry Road, London, ha ka 11 tarik u Naiwieng kum shi bynta jong ka State Legislators’ Executive Leadership Programme ha London bad Cambridge.
Ha kane ka kynhun ka kynthup ïa ki MLA bad u Lamphang barim u Abu T. Mondal, u Deputy Chief Whip u Bah Ronnie V. Lyngdoh, u MLA u Dr. Mizannur Rahman Kazi, bad u Stephen Anurag Prathipati, NISG Project Officer bad Co-Lead, Meghalaya Legislative Research Forum (MLRF).
Ka jingleit jngoh ka la ailad ïa ka kynhun ban pyrkhat ïa ka pateng kaba neh jong u Dr. B. R. Ambedkar, u nongshna ba kongsan jong ka Riti Synshar jong ka ri India, bad ki jingnoh synniang ba kordor jong u sha ki jingmut jong ka jingiaryngkat, ka jingbishar hok ha ka imlang sahlang, ka burom briew bad ka synshar paidbah katkum ka riti synshar.
Kum shi bynta jong ka leadership programme, ka jingleit jngoh ka la plie lad ïa ki nongthaw ain ban ioh jinghikai na ka jingim bad jingthmu jong u Dr. Ambedkar, khamtam eh halor ka jingdonkam jong ka jingnang jingstad, ka jingsynshar kaba kynthup lang bad ka jinglong nongialam kaba don nongrim ha kaba pynkhlain ïa ki tnat synshar paidbah bad ka jingshakri paidbah.
