Ngi kyrshan ïa ka roi ka san ka bym ktah ïa ka mariang, dei ban pyndam noh ïa ka projek Ropeway

Shillong, Naiwieng 13: Ka seng United Democratic Party (UDP) Youth Wing ha ka sngi Thohdieng ka la phah da ka shithi sha u Myntri Rangbah ka jylla u Conrad K. Sangma ban kyntu ïa ka sorkar ban poi sha ka jingïasngewthuh jingmut hapdeng ka Joint Action Committee (JAC) pyrshah ïa ka Ropeway Project.
Katkum ka shithi, ka UDP Youth Wing ka la ong ba ka kyrshan ïa ka roi ka san hynrei ka ban jur ba kam dei ban ktah ïa ka mariang khamtam ha ki jaka ba don ki tyllong um.
Ka seng samla ka UDP ka la kyntu ruh ïa ka sorkar jylla ba ka dei ban twad jingmut sani bha halor kane ka bynta bad ki dorbar shnong, ki syiem bad ka KHADC shwa ban ïaid shakhmat ïa kane ka kam.
Ha kajuh ka por, lah ban ong ba ka jingdawa ban pynduh noh ïa katei ka projek ka la ïoh jingkyrshan kham bun ha kaba la ïohi ba ki nongshong shnong ki la leit jngoh ïa ki dkhot kiba ïakhih ha u mot jong U Kiang Nongbah hajan Civil Hospital.
Ha kawei pat ka liang ka seng kynthei ka Hynñiewtrep Youth Council kaba la ïalam da ka Kong Badashisha Lyngkhoi, president ka la wan ban kyrshan ïa ka jingdawa ban pyndam noh ïa ka Ropeway Project.
Haba kren sha ki lad pathai khubor ha ka sngi Thohdieng, ka Kong K. Sohshang vice president ka la ong ba ka seng ka dap da ka jingsngewkhia kaba jur ban ïohi ïa ka jingïakhih jong ki longkmie ban dawa na ka sorkar ban pyndam noh ïa ka projek Ropeway ha u Lum Shyllong.
Shuh shuh, ka la ong ruh ba ki nongmihkhmat kiba mynta kim don ka jingsngew kitkhlieh ïa kaei kaban jia ïa ki pateng ban wan.
Ka Kong Sohshang ka la ong ba u Lum Shyllong u dei u klongsnam ym tang jong ka nongbah Shillong hynrei wat jong ka thaiñ lum Khasi-Jaiñtia ruh.
Ka vice president ka HYC ka la ong ba ki kpa tymmen ki la ju ong ïa ki pateng kiba thymmai ba dei ban pynneh pynsah ïa ki khlaw bad ki dieng, hynrei ka pateng kaba mynta ka pom ïa ki dieng bad pynjaboh ïa ki wah.
“Ngi don hangne ban ai ka jingkyrshan ïa ki longkmie”, la ong ka Sohshang wat haba ka la pynrem ïa ka jingleh jong ki pulit ïa ki dkhot jong ka Joint Action Committee (JAC) ha ka jingïaid paidbah jong ki sha Secretariat ha ka sngi Palei.
Ka la kyntu ruh ïa ka sorkar ba kan sngap ïa ki jingdawa jong ki dkhot ka JAC bad ban pynduh noh ïa ka Ropeway Project da kaba bynrap ba ïa kane ka projek ba la dawa da kiba ïakhih ka sorkar ka sngap jar ïa ki jingkyrpad.