Shillong, Naiwieng 13: Ka Hynñiewtrep Youths’ Council (HYC) ha ka sngi palei ka la pyrshah jur ïa ka jingpyndonkam ïa ka kyrteng ‘Barapani’ ha ka jaka ka kyrteng ‘Umiam’ da ka Indian Hotels Company Limited (IHCL) ha ka jingpynbna khubor ba la pynbna ban soi ïa ka Taj Resort ha Meghalaya.
Ha ka kyrwoh, ka HYC ka la ong ba katei ka jaka ka dei kaba la tip ha ka thain bad ha ka histori kum ka ‘Umiam’, bad dei ban burom bad ithuh ïa ka jinglong jong ka.
“Ka jaka ka dei kaba la tip ha ka thain bad ha ka histori kum ka ‘Umiam’, bad dei ban burom bad ithuh ïa ka jinglong jong ka”, la ong ka HYC.
Ka Council ka la khot ïa ka IHCL, kum ka kompeni pdiang sngewbha ka ban pynbna bad pynpaw pyrthei ïa ka Taj Resort, ban pynshai balei ka la pyndonkam ïa ka kyrteng ‘Barapani’ ha ka jingpynbna pathai khubor ba pura jong ka kaba la pynmih ha ka 12 tarik u Naiwieng, 2026.
Ka la pan jingshai ruh na ka Umiam Hotels Pvt. Ltd., ka paralok na ka thain ha ka projek, halor ka bynta bad ka kyrdan jong ka ha kaba ïadei bad ka jingpyndonkam ïa ka kyrteng ‘Barapani’ bad la ka kyrshan ne mynjur ïa ka jingpynkynmaw.
“U partner ba na ka thaiñ u dei ruh ban pynthikna ba ïa ka jingithuh bad ka kyrteng ba la ithuh ha ka thaiñ jong ka Umiam la burom ha baroh ki kot ki sla bad ki jingpyntip kiba ïadei bad ka projek,” ong ka HYC.
Ka HYC ka la dawa ba baroh ar tylli ki IHCL bad ka Umiam Hotels Pvt. Ltd. Da kaba pynbiang ïa ka jingshai bad pynthikna mardor ïa ki lad ban pynbeit kiba donkam.
“Ka jingbym lah ban jubab hapoh ka por kaba biang kan pynlong ïa ka HYC ban pyrkhat ban shim ïa ki sienjam kiba biang,” ka la maham.
Haba pdiang sngewbha ïa ka roi ka par, ka Council ka la kren shai kdae ba ym lah ban shu ïalehkai ïa ka jinglong kyrpang.
“Ka roi ka par bad ka jingbei tyngka ka long kaba pdiang sngewbha ha Meghalaya, hynrei ym ju don ha ka jingduhnong ïa ka jinglong tynrai bad ka pateng tynrai jong ngi,” ong ka HYC.
Ka la pynkut da kaba ong: “Ka ri jong ngi ka don ka kyrteng.Ka dei ka Umiam, ym ka Barapani!”
