Ban ai jingtip shaphang ki hok ki nongshong shnong, da ka jingïaid thuk thuk pynlong ka MSLSA

Shillong, Naiwieng 13: Ka Meghalaya State Legal Services Authority (MSLSA) ka la pynlong ïa ka jingïaid paidbah da ki thuk thuk ha nongbah Shillong kum shi bynta ban rakhe ïa ka Legal Services Week, da ka jingthmu ban pynsaphriang ïa ka jingtip shaphang ki hok jong ki nongshong shnong bad ki kamram ba kongsan jong ki nongshong shnong.
Ïa kane ka jingïaid paidbah la plie lama na phyllaw jong ka Ïingkashari jong ka jylla Meghalaya da u Justice H.S. Thangkhiew, u Nongbishar ka High Court jong ka jylla Meghalaya, ha ka jingïadonlang u Justice W. Diengdoh, u Justice Biswadeep Bhattacharjee bad kiwei kiwei ki ophisar bad ki nongtrei ka High Court.
Ki nongñiah biker kiba la ïashim bynta ki la ïaid lyngba ki bynta bapher bapher jong ka nongbah, kynthup ïa ka Police Bazar, Polo, Jingkieng Mawlai , Garikhana, Anjalee Point bad Civil Hospital, shwa ba kin leit phai biang sha jaka jong ka High Court, ha kaba la pynkut noh ïa ka rally.
Ha kane ka jingïaid paidbah, ki nongïashim bynta ki la rah ïa ki placard kiba don ïa ki khubor kum “Duties-Rights” bad “Fundamental Duties” ban pynpaw ïa ka jingdonkam ban pynsngewthuh ïa ki hok bad jingkitkhlieh jong ka riti synshar.
Ïa kane ka rally la pynlong hapoh ka phang “Access to Justice” kum shi bynta jong ka Legal Services Week, kaba thmu ban kyntiew ïa ka jingsngewthuh shaphang ki jingshakri aiñ bad ban pynpaw ïa ka jingdonkam ban pynthikna ïa ka jingïoh ïa ka hok na ka bynta baroh.