Shisien tied yn pynsawa ki 1000 tylli ki ksing ha ka Jubili Ksiar Wangala
Buhthong ka Garo Hills ban thaw World Record
Shillong, Naiwieng 09 : Ka Rilum Garo ka dang pynkhreh ban thaw ïa ka histori ha ka pyrthei, ha kaba ka 100 Drums Wangala Festival kan pyrshang ban wallam lang ïa 1,000 tylli ki ksing tynrai ha kawei ka lympung kaba heh bad kaba kongsan bha kum shibynta ban rakhe ïa ka jingdap 50 snem lane ka Golden Jubilee jong ka Lehkmen Wangala.
Kane ka lympung kaba heh, kaba thmu ban pynrung haduh ka Guinness World Records, kan long ka bynta ba kongsan jong ka jingïaid lynti kaba 50 snem jong kane ka tamasa, kaba la buh ban pynlong naduh ka 11 tarik haduh ka 14 tarik Naiwieng, 2026, ha Wangala A-dam, Chibragre, West Garo Hills.
“Ka bynta kaba kongsan tam jong kane ka jingrakhe kaba kyrpang kan long ka jingpyrshang kaba heh ban wallam lang ïa 1,000 tylli ki ksing tynrai ha kawei ka lympung da ka jingthmu ban thaw ïa ka rekod ha ka Guinness World Records,” la ong ka 100 Drums Wangala Festival Committee ha ka jingpyllait khubor.
“Kane ka sienjam kaba don histori ka thmu ban pyni ïa ka pateng tem tynrai jong ki paid Garo ha ka rynsan jong ka ri bad ha ka pyrthei,” ka la bynrap.
Ïa kane ka jingpynbna la pynmih da ka 100 Drums Wangala Festival Committee bad ka Media and Publicity Sub-Committee jong ka Golden Jubilee Celebration 2026.
Hadien 50 snem naduh ba la sdang ïa kane ka festival, mynta ka la kylla long ka jingrakhe kolshor kaba heh tam jong ki paid Garo.
“Ka 100 Drums Wangala Festival ka dei ka tamasa pyni kolshor kaba heh tam bad kaba la pawnam tam jong ki paid Garo, kaba pyni ïa ka pateng tynrai kaba riewspah jong ngi, ka sur tem tynrai, ki jaiñkup kiba itynnad, ki jingshad, ki rukom leh niam bad ka mynsiem jingïatylli jong ka imlang sahlang,” la ong ka committee.
“Ka Golden Jubilee ka dei ka dak ïa ka jingdap sanphew snem jong ka jingpynneh pynsah bad kyntiew ïa ka jinglong kyrpang ha ka kolshor jong ki paid Garo,” ka la bynrap.
La khmih lynti ba kane ka tamasa kaba saw sngi kan khring ïa hajar ngut ki nongwan jngohkai, ki kynhun pyni kolshor, ki nongshad bad ki riewpawkhmat na kylleng ka Meghalaya, ka thain shatei lam-mihngi jong ka ri bad shabar jong ka thaiñ, kaba pynlong ïa ka Chibragre kum ka dohnud jong ka kolshor Garo.