Banjur ban ïakren bad ka JAC ha kaba ïadei bad ka Ropeway ba kynnoh ktah ïa ki tyllong um

Shillong, Naiwieng 09: Ka Lympung Ki Seng kynthei East Khasi Hills District Shillong, ha ka kyrwoh khubor ba la phah da ka kong M. Blah ka General Secretary bad ka President ka Lympung Ki Seng Kynthei ka kong T. Phanbuh, ki la ïathuh ba ka Lympung Ki Seng Kynthei, ka la phah da ka shithi sha u Myntri Rangbah ka jylla Meghalaya, u Conrad K. Sangma ha kaba ïadei bad ka jaka ring um ha u Lum Shyllong.
Ha katei ka shithi, ka la pyntip ba ka kane ka Lympung Ki Seng Kynthei, kawei ka kynhun kaba pynïaid bad pynsnoh ïa ki seng kynthei bapher bapher ha Shillong, ka la ïohpdiang ïa ka shithi kaba ha ka 1 tarik Naiwieng 2026 na ka Joint Action Committee (JAC) kaba pyrshah ïa ka Shillong Ropeway Project bad na ka bynta ka jingïada iaki jaka ring um, ki tyllong um ha U Lum Shyllong.
Ka Lympung ka la ong ba kum ki kmie, ki don ka jingsngewkhia kaba jylliew ba kane ka projek kan ktah ïa ki tyllong um bad ïa ka mariang. Ka la ong ba ka seng jong ki ka ïeng halor ka nongrim ban ïada ïa ka mariang bad ban pyrshah ïa ka jingjot jong ka. Ki sngew ba kino kino ki projek lane ki jingkyntiew pynroi ki ban ktah ïa ka mariang kim dei ban treikam satia ha kino kino ki rukom.
Halor katei ka shithi, ki kyrpad ban ban ïakren bad ki dkhot jong ka JAC, namar ki jingeh ki lah ban jem tang lyngba ka jingïakren. Ki sngewkhia palat ban ynda ïohi ba ka jingpyrshah ka nang kham khraw bad nang khlaiñ.
Ka sorkar ka lah ban pynlong ne thaw ïa kawei ka komiti da ki riew shemphang na ki tnad sorkar bapher bapher kiba ïadei bad ki katto katne ki briew kiba don ka jingtip kaba bha na ka imlang sahlang. Kane ka komiti ka lah ban ai jingmut, ki nia bad ki jingtyrwa ki ban tei na ka bynta ki lad ki lynti bapher bapher.
“Kumta kane ka Seng ka kyrpad biang sa shisien ban ñiewburom ïa ka jingsngew bad ka sur jong ki paidbah bad ba hapoh ka jingpynïaid bad ka jingïalam kaba shitrhem jong kane ka sorkar, ki kyrmen bad khmih lynti ïa ka jingpyrkhat ba bha jong ka ïa ki jingtyrwa kiba rit jong ki,” ong ka shithi na ki nongïalam kane ka Lympung bad la bynrap ruh da kaba ïathuh ba kane ka shithi, la phah lang sha u Myntri ka Kam Jngohkai pyrthei, ka sorkar Meghalaya, u Bah Paul Lyngdoh.