Shillong, Naiwieng 09: Ka Khasi Students’ Union (KSU), ha ka sngi Nyngkong, ka la mudui da ka First Information Report (FIR) ka Ejahar sha u Superintendent of Police (SP), East Jaiñtia Hills District, Khliehriat, halor ka jingjia kaba la jia ha ka 7 tarik u Naiwieng, 2026, ha kaba ki briew kiba don kumba 8 haduh 10 ngut, kiba la rah ïa ki tiar pynmynsaw kum ki wait, ki dieng bad ki jri, ki la pyrshang ban khanglad bad byrngem ïa ki nongshong shnong ka Shnongrim bad ïa ki nongïalam jong ka Union.
Katkum ka kyrwoh khubor ka seng ka pynpaw ba ka jingleit jong ki Nongïalam ka Seng ha ka 7 tarik u Naiwieng sha ka shnong Daistong bad Shnongrim ka long shi bynta ban ïakynduh bad ïasyllok bad ki nongshong shnong jong katei ka thaiñ, khamtam halor ka jingthmu jong ka Shree Cement ban pynïeng ïa ka karkhana shna dewbilat (Cement Plant) ha Daistong.
La iathuh ba ha katei ka jingleit, ki Nongïalam ki la ïoh ban ïa kynduh bad ki nongïalam jong kine ki ar tylli ki shnong ban ïakren halor ki jingeh bad ki jingsngewkhia jong ki nongshong shnong kiba ïadei bad ka jingthmu jong ka Shree Cement, kumjuh ruh halor kiwei pat ki mat kiba ktah ïa ka bha ka miat jong ki shnong.
Ka nongrim jong ka Seng ha kane ka jingleit ka long ban ïasyllok, ai jingkyrshan bad pynshlur ïa ki paradoh parasnam ba kin ïaineh ha ka jingïakhun jong ki pyrshah ïa ka jingwan jong ka Shree Cement ha katei ka thaiñ, katba ka jingtohkit jong ka Fact Finding Committee ka dang ïaid shakhmat.
La ong ba ha kane ka jingleit, ka Seng ka long ban sakhi ïa ki kam bad ki jingïaid jong ka ha Daistong. Ka Seng ka la pynlong ruh ïa ka jingïalang kaba lyngkot ban ïa phylliew jingmut bad ban ïakren halor kiba bun ki mat kiba ïadei bad ka jinglong jingman jong katei ka thaiñ. Ha katei ka jingïalang, la sakhi ïa ka jingwan shim bynta jong ki riew rangbah, ki longkmie bad ki samla jong ka shnong.
La iathuh ruh ba hadien ba la pynkut ïa ka jingïalang, ka Seng, ryngkat bad ki nongïalam shnong, ka la leit ban jurip ïa ka jaka ba la thmu ban pynïeng ïa ka Cement Plant, khnang ban tip ïa ka jinglong jingman jong katei ka jaka bad ban lap la ki don ne em ki kam pynkhreh kiba dang ïaid ha katei ka jaka, katba ka Fact Finding Committee ka dang pynlong ïa ka jingtohkit.
Hynrei, la ong ha ka por ba ka Seng bad ki nongshong shnong ki dang leit jurip, kynsan kynsan la mih kumba 6 haduh 10 ngut ki briew kiba la kah durkhmat bad pyrshang ban khanglad ïa ka Seng bad ki nongshong shnong ban ïaid lynti. La kynnoh ba kine ki briew ki la sei ruh ïa ki tiar pynmynsaw, kynthup ïa ki wait ki dieng bad ki jri bad ki la pyrshang ruh ban thombor ïa uwei na ki dkhot jong ka Seng.
Shuh shuh ka kyrwoh ka ong ba ha katei ka por, ka Seng ka la hap ban ïada ïalade, katba ki nongïalam jong ka, ki dang pyrshang ban pynjem ïa ka jingïakynad. Kane ka jingjia ka la kylla long ka jingïapyni bor kaba la paw ruh ha ki lad pathai khubor. Hadien kata, kine ki briew ki la mih noh na katei ka jaka bad leit sha ka jaka ba don ki pulit.
La ong ba kum ka seng ki sngewkhia ba hadien katei ka jingjia, haba ki nongïalam jong ka Seng ki la leit ban pyntip sha ki pulit kiba don ha katei ka thaiñ, kim shym la shim ïa ki sienjam kiba donkam ban kem ïa kiba ki donkti, watla ka Seng ka la pan jingïarap. Hynrei ki Pulit ki la ailad ïa kitei ki briew ban mih noh na katei ka jaka.
“Ka jingbym shimkhia jong ki pulit ka la pynlong ïa u General Secretary jong ka Seng ban phone ruh ïa u SP ban pyntip halor katei ka jingjia. Hynrei, wat hadien kane, kam shym la don kano kano ka sienjam kaba seisoh ban shimkhia ïa katei ka ka,” ong ka kyrwoh na ka Seng.
Shuh shuh la ong ba kaba pynlyngngoh bad sngewkhia shuh shuh ïa ka Seng ka long ba hadien katei ka jingjia, ki la don ki briew kiba la kah durkhmat, kiba la sei ïa ki tiar pynmynsaw bad pyrshang ban khanglad ïa ka lynti, hynrei kynnoh pat ba ki la shah shoh.
“Ka Seng ka pynpaw ba ka don ka jingïapher kaba shai hapdeng ka jingshisha bad ka jingpyrshang ban pynkylla ïa ka jingshisha. Ki dur khih (videos) kiba la paw ha ki lad pathai khubor ki dei ki sakhi kiba donkam ban peit bniah khnang ban lap ïa ka jingshisha halor katei ka jingjia” ong ka kyrwoh.
Ka Seng ka sngewkhia ba kum kine ki jingjia ki lah ban dei ka jingpyrshang jong katto katne ngut ki briew kiba ïadei bad ki nongkyrshan ne ki agent jong ka Shree Cement ban pynmih ïa ka jingïakynad bad ban kynshoit ïa ka Seng. Namarkata, ka Seng ka dawa ïa ki bor ba dei khmih ba kin tohkit bniah ïa katei ka jingjia bad ban pynlong ïa ka jingbishar kaba hok, khlem da shah liang.
Ka la ong ruh ba ka Seng kan ïaineh ha ka jingïeng ryngkat bad ki nongshong shnong jong Daistong, Shnongrim bad baroh ki shnong kiba don bynta ha kane ka kam. “Ngi ngeit skhem ba ka rai halor ka lawei jong ki shnong ka dei ban mih na ka jingsngew bad ka mon jong ki nongshong shnong hi, ym ban shah pynbor ne shah pyndik ha kano kano ka rukom,” ong ka kyrwoh na u samla Shining Kharbihkhiew, Environment Secretary Khasi Students’ Union, Central Executive Council.
