Shillong, Naiwieng 09 : Ka jingïakhih khlem buh por pyrshah ïa ka Shillong Ropeway Project ka la rung ha ka sngi kaba saw ha kane ka Sngi Nyngkong, ha kaba ka Joint Action Committee (JAC) ka la pynskhem ba kan bteng ïa ka jingïakhih tad haduh ba ka sorkar kan pyndam noh ïa ka projek ne pynkynriah shawei.
Ka Secretary jong ka Joint Action Committee Against Shillong Ropeway Project, ka Dr Linda Marbaniang, ka la ong ba ka rai ban bteng ïa ka jingïakhih la shim da ka jingïasngewthuh lang jong baroh ki longkmie.
Ka la ong, “Ngi kum ki kmie ngi la rai ban bteng ïa kane ka jingïakhih haduh kaba kut, tad haduh ba ka sorkar kan jubab ïa ka jingdawa jong ngi.”
Haba kdew ba haduh mynta ym pat don kano kano ka jubab na ka sorkar, ka la ong, “Ngi la don hangne la saw sngi saw miet, hynrei ka sorkar ka dang sngap jar. Ngi kwah ba ka sorkar kan wan shakhmat bad pynbna ïa la ka rai. Kaei ka rai kaba ki la shim?”
Ka Dr Marbaniang ka la ong ba ka JAC ka la pynshai lypa ïa la ka nongrim bad kam don jingthmu ban pynsangeh ïa ka jingïakhih.
Ka la ong, “Ngi la rai ba ngin ym pynsangeh ïa kane ka jingïakhih. Ngin sah hangne tad haduh ba ka sorkar kan pyndam noh ïa ka projek ropeway lane pynkynriah ïa ka shawei.”
Ka la bynrap ba haduh mynta ka sorkar kam pat jubab satia halor ka jingdawa jong ki.
