Lum jingïalang ka ICAR halor ka phang ka buit pynmih symbai babha lyngba ka jingwad bniah ka juk mynta

Shillong, Naiwieng 09: Ka jingïalang pynroi ïa ka jingtbit halor ka ‘Ka buit pynmih symbai ba bha: Ka jingthung ïa ka lawei’ la pynlong da ka jaka wad bniah jong ka ICAR na ka bynta ka thaiñ NEH, Umïam, ha ka 5 tarik u Naiwieng.
Ka jingïalang ka thmu ban pynsngewthuh bad kyntiew ïa ka jingnang jingstad bad jingtbit jong ki nongrep, ki samla nongkyndong, ki nongtrei extension bad kiwei kiwei ki nongshim bynta ha ki buit pynmih symbai kiba bha.
Ki nongmihkhmat na ka Directorate of Agriculture, ki ophisar jong ka tnad rep jong ka Ri-Bhoi bad East Khasi Hills, ki ophisar wadbniah na Shillong, Tura bad Jowai, National Seeds Corporation, AICRI In-charge, Upper Shillong, ADO, Jirang, FPO, Tyrso, ki riewstad saian, ki nongrep kiba ïaid shaphrang bad kiwei kiwei ki nongtrei kiba don bynta ha katei ka sngi ki la ïadonlang ha kane ka sngi.
Ka workshop ka la ai ka rynsan ban ïakren bad ïasam jingtip hapdeng ki jaka wad bniah, ki tnad sorkar, ki extension agencies, ki nongrep bad kiwei kiwei ki nongshim bynta, bad ka la pynpaw ïa ka jingdonkam ban ïatreilang ban pynkhlaiñ ïa ka rukom pynmih bad sam symbai ba bha ha ka jylla Meghalaya.