Shillong, Naiwieng 07: Kum shi bynta ban kyntiew ïa ka bha ka miat jong ki paidbah bad ban pynkhlaiñ ïa ki jingshakri ha ka koit ka khiah ha ka thaiñ, ka North Eastern Electric Power Corporation Limited (NEEPCO) ka la ai sngewbha ïa ki ar tylli ki Ambulance sha ka ophis u Deputy Commissioner, East Khasi Hills District, Meghalaya, lyngba ka Corporate Social Responsibility (CSR) Initiative jong ka.
Hadien kane pat, u Deputy Commissioner u la aiti sha ka ophis u District Medical & Health Officer, East Khasi Hills District, Shillong, ha ka jingdonlang jong ki heh ophisar na ka Corporate Office jong ka NEEPCO, kiba kynthup ïa u Kanchan Bhusan Paul, CGM (T) nangta u Diganta Bora, GM (HR), u Hemanta Baruah, GM (HR) bad u Safar Ali Ahmed, DGM (CSR).
Katkum ka kyrwoh la ong ba ïa kine ki Ambulance yn sam sha ki Community Health Centres (CHCs) bad Primary Health Centres (PHCs) bapher bapher ha kylleng ka East Khasi Hills District, khnang ban pynsuk ïa ka jingai jingïarap bad ka leit ka wan kaba kloi bad kaba shngaiñ ïa ki nongpang kiba donkam ïa ka jingsumar.
Kane ka sienjam ka thmu ban pynkhlaiñ ïa ki lad jingïarap ïa ki nongpang ha ki por ba kyrkieh, khamtam eh ha ki jaka nongkyndong bad ki jaka kiba dang duna ki lad jingsumar, lyngba ka jingpynbha ïa ka jingïoh ïa ki jingshakri jong ka koit ka khiah bad ban pynthikna ba ki nongpang kin lah ban poi sha ki jaka ai jingsumar ha ka por kaba biang.
Lyngba kum kine ki sienjam hapoh ka CSR, ka NEEPCO ka dang pynskhem biang ïa ka jingkular jong ka ban kyrshan ïa ka roi ka par kaba kynthup lang ïa baroh, ka bha ka miat jong ki paidbah bad ban kyntiew ïa ka jingim jong ki briew ha ki thaiñ ba ka trei kam.
