Dei ban don ka aiñ kaba khlaiñ bha ban khang lad ïa ka jingphet seng ki nongmihkhmat, pynpaw u GS ka UDP

Shillong, Naiwieng 07: U General Secretary ka UDP u Bah Titosstarwell Chyne ha ka sngi Thohdieng u la ong ba ka khyrnit kaba 10 ne ka Tenth Schedule kam pat dei satia ka rukom treikam kaba pura ban khanglad ïa ka jingphet seng, bad u MLA uba kwah ban mih na kano kano ka party u dei ban iehnoh shuwa ïa ka kam.
U Bah Chyne u la kynthoh halor ka jingleit phai noh jong ki 11 ngut ki nongthaw aiñ jong ka UDP, 8 ngut sha ka BJP bad 3 ngut sha ka NPP.
U la ong ba kito kiba mih, lait noh tang iwei arngut, kim shym la kynnoh ïa ka seng. Ki la leit noh namar ki daw shimet.
“Ka don ka jingïaid beit ha kano kano ka seng saiñ pyrthei wat lada ki MLA bad ki nongïalam ki mih noh,” la ong u Bah Chyne.
U la ong ba na ki 35 ngut ki nongkitkam, 14 ngut ki la mih na ka UDP kynthup ïa ki MLA. Kiba sah kynthup ki MDC bad ki nongmihkhmat ki dang don bad ka party.
U la ong ba ka jingïalang jong ka Central Executive Committee kaba dangshen ka la ïohi ïa ka jingwan paidbah kaba pura, bad ka jingtreikam jong ka seng kam shym la thut. Ka UDP ka dang don ïa u president bad u General Secretary.
Ka sienjam kaba bud, la ong u Chyne, ka long ban pynbeit thymmai ha ki jaka ba ki MLA kiba la shah iehnoh ki dei ki nongkitkam. Ka dei ka seng samla kaba shah ktah jur bha, ha kaba u president u Bah Kyrmen Shylla bad u General Secretary u Bah Balajied Kupar Synrem baroh arngut ki la phet noh sha ka seng BJP. Ka jingïalang bah jong ka seng samla kan long ha u bnai Nohprah ban jied ïa ki nongkitkam ba thymmai.
U Bah Chyne u la ong ba ki briew khamtam ki riew rangbah kiba sngewtynnad ïa ka jinglong thaiñ, mynta ki sngew ba ka jylla ka donkam ïa ka seng thaiñ bad ki sngewtynnad ïa ka UDP. U la kam ba ka seng ka la ïoh ïa ki nongsngewthuh na kiba bun ki liang kiba kloi ban ïadon bynta bad wat ban ïakhun ïa ka elekshon sha ka ïing dorbar thawaiñ jong u snem 2028.
“Ngi don ka jingkyrmen ba ngin ïaid shakhmat ban pynkhlaiñ ïa ka party”, u la ong.
U la pynkynmaw ba naduh ka por jong u Bah E K Mawlong bad u Dr Donkupar Roy, ka jingïateh lok jong ka UDP ha ki sorkar synrop ka dei tang ka jingïateh jong ki rangbah, khlem don eiei ha ka lieh bad ka ïong, kaba pynshong nongrim ha ka jingïaburom markylliang.