Sngewkmen u MLA halor ka jingiaid shaphrang ka jingtei ïa ka EMRS School ba T. 60 Klur

Shillong, Naiwieng 7: U Bah Heavingstone Kharpran, MLA ka 13-Mawryngkneng Constituency, u la leit ban jurip ïa ka jingiaid shaphrang jong ka jingtei ïa ka Eklavya Model Residential School (EMRS) ha Sohryngkham, ha kaba u la pynpaw ïa ka jingsngewkmen bad jingsngewhun halor ka jingiaid shaphrang jong ka kam.
Ha kane ka jingjurip, u MLA u la peit bniah ïa ka jingiaid jong ka jingtei bad u la iakren bad u kontraktor lem bad ki engineer kiba peit ia kane ka projek, khnang ban tip ia ka jingiaid shaphrang bad ia ka por ba la buh ban pyndep ia ka.
Katkum ka jingpynpaw jong u kontraktor ha katei ka jaka, la kular ban pyndep ïa ka projek baroh kawei hapoh u bnai Lber 2027.U MLA u la pynpaw ïa ka jingsngewkmen halor kane ka jingkular, bad ha kajuh ka por u la ban jur ïa ka jingdonkam ban pynneh ïa ka jingbha jong ka jingtei bad ban pyndep ïa ka kam hapoh ka por ba la buh.
Ha ka jingai jingkren jong u, u Bah Heavingstone Kharpran u la pyntip sha ki paidbah jong ka constituency ba ïa kane ka Eklavya Model Residential School ha Sohryngkham la mang bad mynjur ha ka jinglut kaba T. 60 Klur, kaba long kawei na ki projek kiba kongsan ha ka liang ka pule puthi bad ka jingtei ïa ki jingdonkam na ka bynta ka pule puthi hapoh ka thain.
Kane ka skul ka thmu ban ai ïa ka jingpule kaba bha ryngkat bad ka jaka sah na ka bynta ki khynnah pule, khamtam eh ïa ki khynnah kiba dei na ki jaidbynriew riewlum, khnang ba kin ïoh ïa ki lad pule kiba kham bha.
U MLA u la pynkynmaw ba ïa ka jingthmu ban wanrah ïa kane ka skul ha Sohryngkham la sdang naduh u snem 2023.Naduh katei ka por, la don ka jingpyrshang bad ka jingbuddien kaba iai bteng bad ki tnad sorkar kiba dei peit, haduh ba kane ka projek ka la poi sha kane ka kyrdan jong ka jingtei kaba mynta.
U Bah Kharpran u la pynpaw ruh ïa ka jingsngewnguh kaba khraw sha ka Dorbar Shnong Sohryngkham kaba la ai ïa ka jaka kaba 15 akar na ka bynta ban tei ïa kane ka skul.
U la ong ba ka jingiatreilang bad ka jingkyrshan jong ka Dorbar Shnong ka la long ka bynta kaba kongsan bha kaba la iarap ban pynurlong ïa kane ka projek kaba donkam na ka bynta ka lawei jong ki khun samla bad ki pateng ban wan.
Ha kajuh ka por, u MLA u la pyntip ba u la dep ban kyrpad ia ka Sorkar Jylla ban shimkhia ban tei ia ka surok ban rung sha kane ka skul (approach road).
U la ban jur ba ka surok kaba biang ka long kaba donkam bha, ym tang na ka bynta ban pynsuk ïa ka jingkit jingbah bad ka jingiaid jong ki kali ha ka por ba dang tei ïa ka skul, hynrei ruh na ka bynta ka jingsuk bad jingshngain jong ki khynnah pule, ki nonghikai, ki nongtrei bad kiwei pat ynda la sdang ban pyniaid ïa kane ka jaka pule.
U la pynpaw ïa ka jingkyrmen ba ka Sorkar kan shimkhia ïa kane ka jingkyrpad bad kan leh ïa kaba donkam khnang ba ka surok kan long kaba la pynkhreh ha ka por ba kane ka skul kan sdang ban treikam.
U MLA u la pynpaw ruh ba un ïai bteng ban buddien bad ban peitngor ïa ka jingiaid jong ka projek, bad ban iatreilang bad ki tnad sorkar kiba dei peit, khnang ba ïa ka kam yn lah ban pyndep hapoh ka por ba la kular da u kontraktor.
Ha kane ka jingjurip, u Secretary jong ka Dorbar Shnong Sohryngkham, ha ka kyrteng jong ka Dorbar Shnong, u la pynpaw ïa ka jingsngewnguh kaba khraw sha u Bah Heavingstone Kharpran halor ka jingaiti, ka jingtrei shitom bad ka jingpyrshang kaba khlem sangeh jong u naduh ba la sdang ïa ka jingthmu ban wanrah ïa kane ka skul ha u snem 2023.
U Secretary u la pynpaw ba ka jingshimkhia shimet jong u MLA, ka jingbuddien bad ka jingiatreilang bad ki tnad sorkar kiba dei peit, ka la ïarap shibun ban pynurlong ïa ka jingthmu ban wanrah ïa kane ka jaka pule hapoh ka shnong Sohryngkham.
U la pynpaw ruh ïa ka jingsngewkmen bad jingsngewhun jong ka Dorbar Shnong bad ki paidbah nongshong shnong halor ka jingïohi ïa ka jingiaid shaphrang jong ka jingtei, kaba mynta ka la paw shai ha katei ka jaka.
Shuh shuh, u Secretary u la ai khublei kyrpang ïa u MLA uba la pynlut ïa la ka por ban leit jurip hi dalade ïa ka jaka ba dang tei ïa ka skul, bad uba dang ïai bteng ban shimkhia ïa kane ka projek.
Ha kane ka jingjurip la iadonlang ruh u Sanjay D. Shira, Block Development Officer (BDO) jong ka Mawryngkneng C&RD Block, uba la pynpaw ïa ka jingsngewkmen bad jingsngewhun halor ka jingiaid shaphrang jong ka jingtei ïa kane ka skul.
Ha katei ka sngi, ïa u MLA la synran lang da ki dkhot jong ka Dorbar Shnong Sohryngkham, u site engineer, ki nongtrei jong ka party bad kiwei pat kiba don bynta ha kane ka projek.
Ha kaba kut, u Bah Heavingstone Kharpran u la pynpaw ïa ka jingkyrmen ba kane ka Eklavya Model Residential School ha Sohryngkham kan long kawei na ki jaka pule kiba kongsan, kaba yn lah ban ai jingmyntoi ïa ki khynnah pule bad ki pateng ban wan.
U la pynskhem ruh ia ka jingkut jingmut jong u ban iai bteng ban trei na ka bynta ban kyntiew ia ka pule puthi, ban pynbha ia ki jingdonkam ha ki jaka pule, bad ban plie kham bun ki lad pule kiba bha na ka bynta ki paidbah jong ka Mawryngkneng Constituency.