Ïoh jingithuh ka KJP Girls Guide Company kum ka kynhun histori ka Bharat Scouts and Guides

Shillong, Naiwieng 07: Ka K.J.P. Girls Guide Company jong ka K.J.P. Girls’ Higher Secondary School, Jaïaw, Shillong, ka la ïoh jingithuh kum ka Historical Unit/Group jong ka Bharat Scouts and Guides halor ka jingïai bteng ka jong ka ban noh synniang ha ka “Guiding Movement”.
Ïa kane ka jingïoh jingithuh la pynbna da ka Meghalaya Bharat Scouts & Guides hadien ka jingïoh khusnam ha National Headquarters, New Delhi ha ka 4 tarik u Naiwieng 2026, ha ka jingrakhe kane ka seng ïa ka Diamond Jubilee.
Kane ka jingai khusnam kadei ïa ki Scouts bad Guides Unit kiba la seng ha u snem 1950 ne shwa kane bad kiba la bteng beit ban ïai ïashim bynta ha kane ka Movement.
Kane ka jingïoh jingithuh ia ka Unit na Shillong kaba la don ïa ka jingïadei kaba la slem bah bad ka seng, ka jingïai bteng ban noh synniang ha ka “Guiding” bad ka jingkular ban saiñdur ïa ki pateng jong ki khynnah kynthei lyngba kane ka Movement.
Lah palat da ki phew snem ka K.J.P. Girls Guides Unit kadei kaba la btin da ki nongïalam ha ka pule puthi kynthup ïa kiba ïoh ïa ka khusnam Silver Elephant Award i (L) Padma Shree Kong Silverine Swer, (L) Kong S. Briliancy Lyngdoh bad i (L) Kong Evelyne Nora Shullai, ba long ruh ka State Secretary barim jong ka Meghalaya Bharat Scouts & Guides.
Katkum ka jingpynpaw jong ka State Secretary M. Lyngdoh, ka jingïalam ka jong ki bad ka jingnoh synniang ka la ïarap ban saiñdur ïa kiba bun kiba la ïoh khusnam na ka jylla bad long ruh ka jingsahnam junom kaba ïai bteng ban ai mynsiem ïa ki pateng ban dang wan jong ki Girl Guides.
Ka jingai jingithuh ka long u mawjam uba kongsan ïa ka jaka pule bad pyni ruh ïa ka kamram kaba la ïai bteng naduh mynshwa ha ka ban tei ïa ka jinglong nongïalam, jingdon akor, burom bad ka jingshakri ïa ki kynthei bad longkmie ka Meghalaya.