Shillong, Naiwieng 7: Ka Jylla Meghalaya ka la ïoh pdiang 26.56 klur na ka North Eastern Council (NEC) ha u bnai Risaw, ha kaba ka bhah kaba heh jong ka jingbei tyngka la pynleit jingmut sha ka jingpynbha bad pynkhlain ïa ka surok Chokpot-Kharukol ha South Garo Hills, ka projek kaba la khmih lynti ba kan ai jingmyntoi ïa ki 78 tylli ki shnong bad palat 10,000 ngut ki nongshong shnong.
Ka jingpyllait pisa ka dei shi bynta jong ka jingpynroi kaba kham heh jong ka NEC ha kylleng ka thaiñ shatei lammihngi, kaba la ïohi ïa ka 79.53 klur ba la pyllait hapoh u bnai Risaw 2026 na ka bynta ki projek kiba kynthup ïa ka jingpynïasoh surok, ki jingtei ha nongkyndong, ki lad kamai, ka pule puthi, ka jingwad bniah science bad ka jingpynneh pynsah ïa ka kolshor.
Katkum ka jingpynbna jong ka NEC, ïa ka surok Chokpot-Kharukol kaba jrong 46.08 km la shim hapoh ka North East Special Infrastructure Development Scheme-Roads (NESIDS-Roads).La khmih lynti ba kane ka projek kan pynbha ia ka jingpyniasoh na ka bynta ki shnong ha ka thain.
Ka jylla Meghalaya ka la ïoh ruh ïa ka jingkyrshan ban thaw ïa ka Multi-Disciplinary Training-cum-Resource Centre ha Shillong, kaba thmu ban pynkhlain ïa ki jaka ai jinghikai.
Ha kawei pat ka jingpynroi, ka North-Eastern Hill University (NEHU), Shillong, ka la pyndep ia ka jingshna bad pynmih ia ki tiar laboratory kiba rem dor hapoh u bnai Risaw, kaba pyni ia ka jingnoh synniang sha ka jingwad bniah saian bad ka jingpynmih ia ki tiar laboratory kiba rem dor.
Ki jingpynlait pisa jong ka NEC ha u bnai Risaw ki kynthup ïa ki katto katne ki jylla ha kane ka thaiñ, ha kaba ka Assam ka ïoh T.14.79 klur, ka Sikkim T.15.51 klur, ka Arunachal Pradesh T.11.18 klur, ka Nagaland T.7.99 klur bad ka Tripura T.50.300. La ai ruh ka jingkyrshan ïa ki projek ha Manipur bad Mizoram.
Ka Council ka la ong ba kane ka jingai pisa ka long ban pynbha ïa ki jingtei bad ki lad kamai katba kyrshan ïa ka jingwad bniah ha ka liang ka saian ne ka scientific research, ka rep ka riang, ka pule puthi bad ka jingpynneh pynsah ïa ka pateng tynrai jong ka thaiñ Shatei Lammihngi.
Ïa ki jingpyllait la leh hapoh ki Scheme ka NEC (SoNEC) bad NESIDS – Roads, ryngkat bad ka jingkyrshan ïa ki projek ba kongsan ha kylleng ka thain.
