Ba thmu ban shna surok na Nongrynñiang-Nongtnger, hiar jurip u MLA

Mawkyrwat, Naiwieng 06: Hadien ka jingpynsngew jong ki paidbah ka thaiñ Warsanlyngdoh halor ki jingeh kiba ki mad ha ka leit ka wan namar ka jingbym biang jong ki lynti syngkien, u Bah Pius Marweiñ, MLA/MDC ka Ranikor Constituency, mynta ka sngi u la hiar jurip hi da lade ïa katei ka thaiñ ban peit bniah ïa ka jinglong jingman jong ka jaka, kum shi bynta ban pynkhreh ïa ka jingthmu ban shna ïa ka surok thymmai.
Lah ban kdew ba kane ka jingthmu ban shna ïa ka surok na ka shnong Nongrynñiang bad ban pynïasoh lang ïa ki shnong Nongpuiñskei, Nongmalang, Nonglyng-mendia, Nongtynñiam, Nongtnger, New Nongtnger, Nongmawkynphor, Langjaraiñ, Nongbah Jynrin, Mawthabah, Nongtre bad Nonglang-Urlieh, kaba don ïa ka jingjngai kumba 8 kilometre.
Haba kren ha ki lad pathai khubor, u Bah Pius Marweiñ, MLA/MDC ka Ranikor Constituency u la ong ba kane ka jingleit jurip jong u ïa kane ka surok ka long hadien ka jingpynsngew jong ki paidbah nongshong shnong ba ki la donkam ban don noh ki surok kiba bha khnang ba pynsuk ha ka leit ka wan khamtam eh ha ka pang ka shitom. Kumta, hadien ka jingpynsngew ma u ryngkat ka kynhun na ka ophis jong u PWD (Roads) Ranikor Division naduh u Executive Engineer ki la leit ban jurip ban peit bniah ïa ka jinglong jingman jong ki jaka.
Namar kumba long mynta, kane ka surok kaba don lypa ka poi tang ha New – Nongtnger bad kaba la jot rathai namar ïa kane ka surok kaba wan na Wahkaji sha New – Nongtnger ka hap hapoh ka jingkhmih jong ka KHADC kaba shu ieh khongreng khlem pynbha haduh mynta, bad kaba pynsohsat bad pynshem jingeh ruh ïa u nongmihkhmat ka Ranikor ban pynbha ïa katei ka surok namar ka hap ha ka jingkhmih jong ka KHADC, u la ong.
Namarkata, khnang ban nym buh jingeh ïa u paidbah jong katei ka dong ka thaiñ bad na ka bynta ka jingbha jingmiat jong ki paidbah nongshong shnong, u bah Pius Marweiñ ula phah ban peit bniah noh ba ka surok kan ïaid noh na ka shnong Nongrynñiang ban pynïasnoh sha Nongtnger khnang ba ki paidbah kin ïoh kham kloi ïa ka surok ba bha kumba long lem kum kiwei de ki shnong, kumba la tip ba ka surok ka dei u budlum jong ka ïoh ka kot ha ki shnong ki thaw.
Haba bynrap shuh shuh ïa ka jingkren, u bah Pius Marweiñ u la ai jingmut bad kyntu ïa ka tnad PWD (Roads) jong ka Ranikor Sub Division ba kan pyndep kloi katba lah ïa ka DPR bad leh ruh ïa ki kam ba dei ban pyndep khnang ba ki paidbah jong kane ka dong ka thaiñ kin ïoh noh ban ïaid bad pyndonkam noh ïa ka surok ba bha ha ki khyndiat snem ki ban sa wan.
Ha kane ka jingjurip la synran lang da u Bah R.B. Dkhar, Executive Engineer ka PWD (Roads), Ranikor Division, u Bah Brighstarwell Lynshing, Assistant Executive Engineer PWD (Roads) Ranikor Sub Division, u bah Runningwell Kharchandy, Junior Engineer, PWD (Roads) Ranikor Sub Division, ki nongïalam shnong bad kiwei pat ki riew paidbah jong katei ka thaiñ.