Ngin thaw biang ïa ka bor synshar ong u Conrad ha jingïalang pdiang burom

Shillong, Naiwieng 04 : U National President ka NPP Conrad K Sangma ryngkat u State President ka Party Bah Prestone Tynsong ha ka janmiet sngi Balang ki la pdiang burom ïa lai ngut ki MDC jong ka Trinamool Congress ha GHADC bad uwei u ophisar MCS ba la shongthait, sha ka party NPP ha ka jingïalang kaba long ha ophis treikam ka party ha Shillong.
Kine ki lai ngut ki MDC na ka TMC kiba wan pynïasoh sha ka NPP ki kynthup ïa u Cherak Watre Momin MDC na Kharkutta constituency, u Alphonshus R Marak na Williamagar bad u Agassi R Marak na Balachanda constituency kynthup lang ïa u ophisar MCS ba la shongthait u Pius D Sangma uba dei u Director barim ka tnad Mineral Resources ka sorkar jylla.
Ha kane ka jingïalang la donlang naduh ki nongïalam ba hakhmat ka party kynthup ïa u Bah Sniawbhalang Dhar, Marcuise N Marak, Bah Hamlet Dohling, Bah Donkupar War nalor ki MLA bad MDC ka party
Kane ka jingwan pynïasoh jong kine ki MDC ka jia ruh ha ka por ba ka rilum Garo ka pynkhreh ïa ka elekshon MDC ha katei ka thain kaba la khmih lynti shen ba kan sa long noh.
Na ka liang ki MDC ki la ïathuh ba ki sngewnguh haduh katta katta ba kane ka sorkar ka wanrah ïa ka thup nongthep vote la ka jong na ka bynta ki paidbah riewlum ka rilum Garo bad ong ba ka daw ba ki wan pynïasoh sha ka party ruh ka dei halor kane ka Nongrim.
U National President ka party bad Myntri Rangbah ka Jylla haba kren ha ka jingïalang u la ong ba da ka jingwan pynïasoh jong kine ki lai ngut ka jingbun paid jong ka party ha GHADC ka la kiew mynta sha ka 21 ngut.
“Nga dap da ka jingkmen kaba khraw ba ngan ïohi ïa kane ka sngi ba ngan ïoh ban treilang bad kine ki nongïalam na ka bynta ban kyntiew ïa ka thain bad ïa ka jylla baroh kawei,” u la ong.
Shu shuh u ong ruh ba kane ka jingwan pynïasoh jong kine ki MDC ka la nang ai jingkyrmen kaba khraw ïa ka party ba kin ïoh biang ban thaw ïa ka bor synshar ha GHADC da kaba ïoh ban jop bun ki MDC ha ka elekshon kaban sa long shen.
Na ka liang u Bah Prestone u la ong ba mynta hapoh jingïalam jong u Conrad Sangma ki la ïohi ba ka party ka kiew stet bha khamtam ha Meghalaya.
“Dang shi taiew pat dap lai ngut ki MLA ki wan pynïasoh bad ka party bad mynta sa lai ngut ki MDC. Ka daw ka long ba ki ïohi ïa ka jinglong nongïalam ha ka NPP bad ka jingïatylli ha ka ïing NPP,” u la ong
Shuh shuh u ong ba ki la ïoh ban thaw history ha ka rilum Garo ba ka party NPP ka nud ban leh. Ngi la thaw history bad phi dei ban tip ba ka jingmut jong ka District Council ka long ban ïada ïa ki trai muluk trai jaka. Kumta ban ym kulmar ka pateng ban sa wan na ka liang ka NPP ka pynbeit ïa kane,” u la ong
Shuh shuh u la ïathuh ba mynta ki la don ha ka kylla ba khatduh ban pyndep ïa ka jingphiah constituency thymmai bad ruh ïa ka thup nongthep vote kaba thymmai kaba ym pat don ki party kiba nud ban leh.
Shuh shuh u ong ba ki don ka jingkyrmen kaba skhem bha ba ha ka elekshon ban wan kin sa ïoh ban jop bun ki seat lah ban long 18, 19 ne 20 tylli ki constituency.
Shwa kane na ka liang u National Vice President ka NPP bah Sniawbhalang Dhar u la ong ba ka jingwan pynïasoh jong ki lai ngut ki MLA bad mynta sa lai ngut ki MDC ka long kum u nombor donbok ïa ka party NPP baroh kawei ba kan kiew arted nangne shakhmat.