Ka jingpyntrei ka lajan dep namar mynta ka sah sa tang 50 km: Rajiv Babbar

Shillong, Naiwieng 04 : U Joint Coordinator ka BJP Northeast, u Rajiv Babbar, hynne ka sngi Balang u la ong ba ka jingker sainar shiah ha khappud ka Jylla bad ka ri Bangladesh ka la jan dep, bad ki jingeh ha ka liang ka teknoloji ha Meghalaya yn sa pynbeit ha ka bynta kaba bud.
U Babbar u la jubab ïa kane halor ki jingkylli halor ka jingbym biang ka jingker ha khappud Meghalaya-Bangladesh bad ki jingkynnoh kiba mih ba kam biang ka jingshimkhia jong ki bor pahara.
U la ong, “Ngi la dep shna ïa ka jingker sainar shiah bad sa tang 50 km kiba dang sah ban pyndep. Kumta, ngi la leh ïa ka kam kaba bha bad mynta ka don ha ka kyrdan technical.”
Haba ai nuksa ïa ka West Bengal, kaba don 653 km ka khappud bad Bangladesh, u la ong, “Ha kine ki 15 snem ba la dep, ngi la ong ïa ka Mamata Banerjee ban ai jaka ïa ngi, hynrei kam shym la ai. Mynta ka BJP ka don ha ka bor synshar bad u Myntri Rangbah thymmai u la ai ïa ka jaka bad ka jingtrei ban ker sainar ka la sdang. Kane ka dei kaba jia shisha bad uno uno ruh u lah ban leit peit.”
Haba kren halor ka jinglong jingman ha Meghalaya, u la ong ba ki don katto katne ki jingeh ha ka liang ka teknoloji kiba yn sa pynbeit, bad ha ka bynta kaba bud yn sa ai jingtip bniah shen.
Haba kylli halor ka jinglap ïa ar ngut ki nongthep vote kiba dei ki nongshong shnong bar ri, u Babbar u la ong ba ka nongrim jong ka BJP halor kane ka kam kam lah ban pynkylla.
U la ong, “Uno uno uba lap ha kano kano ka jaka, kam pher la ka dei ka constituency jong u MLA ka BJP ne jong uwei pat u MLA. Lada don u nongshong shnong bar ri, ka nongrim jong ngi ka long kaba shai, u dei ban mih noh na ka ri. Ym dei ban don kano kano ka jingartatien.”
Haba batai ba ka Special Intensive Revision (SIR) ka dei ka jingpynbeit ïa ka thup ki nongthep vote kaba shai bad kaba khuid, u la ong ba ki notis la phah tang ban pynthikna ïa ka jinglong kaba shisha. U la ong ba ka jingphah notis ka ai lad ïa ki briew ban pynshai ïa la ka jong ka bynta bad kam mut ba la dep shim ïa ka rai kaba khatduh.
U Babbar u la ong, “La u briew u don ha ka constituency jong ka BJP ne ha kano kano ka jylla, u nongshong shnong bar ri um dei ban long u nongthep vote. Kane ka dei ka nongrim jong ngi.”
Haba kren halor ka jingphah mih noh ïa ki nongshong shnong bar ri na India, u la ong ba ki bor distrik bad ki pulit ki bud ïa ka rukom treikam kaba ïaid beit. Lada ki bor distrik ki don ïa ka thup kyrteng jong ki briew kiba dei ban shah phah mih noh, kin leh katkum ka rukom treikam.
U la pynshai ba ka SIR kam don jingïadei bad ka jingphah mih noh ïa ki briew na ka ri. Ka SIR ka ïadei tang bad ka hok thep vote, katba ka jingphah mih noh ïa ki nongshong shnong bar ri ka don la ka jong ka rukom treikam katkum ka aiñ.
U Babbar u la pynkut da kaba ong, “Uno uno uba long u nongshong shnong India, la u don ha Meghalaya, Nagaland ne Delhi, u dei u nongshong shnong jong ngi uba ngi burom bad un ïoh ïa baroh ki hok bad ki jingmyntoi kiba dei hok ïa u.”