Shillong, Naiwieng 04 : U Myntri Rangbah ka Jylla Conrad K Sangma ha ka sngi Balang u la pynshai ba kam shym la don satia kano kano ka jingïa kren ne ka jingpynbeit lypa bad ki nongïalam ka BJP haba ïadei ban ai shuki Myntri ïa ki MLA kiba mih na ka UDP bad leit pynïasoh sha ka BJP.
Haba kren bad ki lad pathai khubor, u Myntri Rangbah u la ong ruh ba kam shym la don wat ka jingïakren ne kular ban pynrung ïa ki MLA ka UDP ha ka shuki Myntri hadien ba ki la dep ban pynïasoh sha ka party BJP.
“Ha ka por ba la ïakren nyngkong halor ka jingpynïasoh jong ki MLA ka UDP sha ka BJP, kam shym la don kano kano ka jingïakren halor ka jingkylla ne jingpynrung Myntri ïa ki,” u la ong da kaba bynrap ba ka sorkar jylla ruh kam shym la don mynta ha kata ka jingïakren.
“Bad kam shym la don hi ruh kano kano ka jingkyrpad halor ka jingai shuki Myntri,” ong u Myntri Rangbah.
Ha kajuh ka por u la pynshai ba ka jingkyrpad ban ai shuki Myntri ïa ki ka la mih hadien ba ka jingdon ki MLA ka BJP ka la kiew na ka 2 ngut sha ka 10 ngut. Shuh shuh u la ïathuh ba dei hadien kane ba u la ïoh ïa ka jingkyrpad ba ka sorkar bad u Myntri Rangbah ba kin pyrkhat ban ai bynta lang ïa ka BJP ha ka shuki Myntri.
Halor kane u Myntri Rangbah u la ong ba ka jingpynrung Myntri kam long satia ka kam kaba suk namar ka jingdon ki shuki Myntri ka long tang khyndiat bad ba la dep ruh ban pynbeit lypa ïa ki. Tangba u ong ba hapdeng kine ruh, ka sorkar kan ïai bteng ban ïatrei lang bad ki baroh kum ka kynhun synrop ha ka sorkar jylla.
