Ar tylli ki Ambulance ai sngewbha ki bor Distrik ban weng jingduna ha jaka sumar nongkyndong

Shillong, Naiwieng 04 : Ban pynkhlaiñ ïa ki jingshakri ha ki por ba donkam kyrkieh ha ki thaiñ nongkyndong, ki bor pyniaid distrik jong ka East Khasi Hills hynne ka sngi Balang ka la aiti ïa ar tylli ki ambulance sha ka District Medical and Health Officer (DM&HO).
U Deputy Commissioner, u Abhilash Baranwal, u la ong ba ïa kane ka sienjam la shim ban kyrshan ïa ki Primary Health Centre (PHC) bad Community Health Centre (CHC) kiba mad ïa ka jingduna ambulance.
U la ong ba ïa kine ki ar tylli ki ambulance la ai sngewbha lyngba ka jingpyrshang jong ka district administration bad mynta la aiti noh sha ka DM&HO khnang ban pynpoi sha ki PHC ne CHC kiba donkam ïa ki.
U la bynrap ba ka DM&HO kan sa rai ïa ki PHC ne CHC kiba dei ban ïoh ïa kine ki ambulance.