Pynkut noh ka UDP ïa ka jingïatreilang bad ka sorkar MDA hadien ba lajan 3 snem ba ïatreilang

Shillong, Naiwieng 03: Ka United Democratic Party (UDP) ha ka sngi nyngkong ka la pynkut noh ïa ka jingïatreilang kaba la jan dap lai snem bad ka sorkar MDA-II ba la ïalam da u Conrad K Sangma, da kaba rai ban weng noh ïa ka jingkyrshan.
Ïa kane ka rai la shim ha ka jingïalang jong ka UDP Central Executive Committee (CEC) hadien ka jingiehnoh kam u President ka party u Bah Metbah Lyngdoh kum u Myntri Sorkar ha ka 1 tarik Naiwieng.
U General Secretary ka UDP Bah Titosstarwell Chyne u la ong ba u Bah Metbah u la pyntip sha ka CEC halor ka jingiehnoh kam jong u kum u Myntri Sorkar.
U la ong, “U President u la pyntip sha ka CEC ba u la iehnoh ïa ka kam Myntri Sorkar bad u la aiti ïa ka shithi iehnoh kam jong u sha u Myntri Rangbah ka jylla ha ka sngi saitjaiñ.”
U la ong, “Shisien ba u President bad MLA ba marwei kum u Myntri, u la iehnoh kam, ka CEC ka sngew ba kan bha ba ngin weng noh ïalade na ka sorkar.”
U Bah T W Chyne u la ong ba ka CEC ka la kyntu ruh ïa u Bah Metbah ba un weng noh ïa ka jingkyrshan jong ka party ïa ka sorkar, kaba ka UDP ka la kyrshan ïa ka MDA naduh u snem 2023 hadien ka jingkhot u Myntri Rangbah ka jylla.
Na ka liang u Bah Chyne u la kyntait ïa kano kano ka jingpynbor kaba don ha lyndet jong ka jingieh noh kam u Bah Metbah Lyngdoh.
U la pynpaw, “Kam shym la don kano kano ka jingpynbor. U President, da ka mon jong u hi bad hadien ba u la ïamir jingmut bad ki nongïalam ka party, u la shim ïa ka rai ban ieh kam noh kum u Myntri Sorkar ha ka sngi Saitjaiñ ba la dep.”
U Bah Chyne u la ïathuh ruh ba ha ka por ba dang ïatreilang hapoh ka MDA ka UDP ka don 12 ngut ki MLA, hynrei mynta don sa tang uwei bad kumta la sngewdei ba kan ym don shuh ka nongrim ban dang ïatreilang bad ka sorkar ha kane ka por kaba mynta.
“Kane kan plie lad ïa u MLA jong ngi ban thaw biang ïa ka UDP ban pynkhlaiñ biang bad halor ki mat kiba ka party ka ju rah manla ka por, kan ïai buddien beit bad namarba ngi don lang bad ka sorkar bunsien ngim ïoh ban kren hynrei mynta ba la long laitluid ngin sa lah ban kynthoh ne ban kren ïa kiba bun ki mat jong ka party,” ong u Bah Chyne.
Ha kawei pat ka liang ka CEC ka UDP ka la ïakren ruh halor ka elekshon sha ka GHADC ha kaba na ka liang ka party ha u snem ba la dep u 2025, jong u bnai Lber la dep ban pynbna ïa ki kyrtong, hynrei namar ka jingpynkynriah ne pynjlan ïa kane ka elekshon bad ha kane ka jingpynkynriah la ong ba kan sa don ka jingphiah ïa ki constituency kan sa don ka jingpynkynriah ïa ki shnong ki thaw kumta ïa kato ka thup ba la dep ban pynbna mynshwa yn pyndam noh shwa.
Halor kane na ka liang u Bah Titosstarwell Chyne uba dei u General Secretary ka UDP u la ong ba ka CEC ka la ai bor ha u Organising Secretary kumno ban leit sha baroh ki Constituency bad khamtam sha kito ki Constituency ba ki MLA ki la phet ban thaw biang ïa ka party.
U Bah Titos u la ong ba ka UDP kaba don mynshwa 12 ngut ki MLA ha ka Sorkar synroplang, mynta ka la don tang uwei, bad kam ïohi ïa ka nongrim ban bteng ban don bynta ha ka sorkar.
“Ka NPP marwei ka don 36 ngut ki MLA, bad da ka jingkyrshan jong ki 11 ngut ki MLA bad ka HSPDP, ki don ka jingdon u Number uba biang bha ban bteng ban ïalam ïa ka sorkar,” u la ong.
“Mynta ka party kan pynleit jingmut ban nang pynkhlaiñ ïa ka Party khamtam ha ki constituency ba kam don MLA ne MDC,” u la bynrap.
U la ong, “Kane kan ai por ïa u president jong ngi, uba dei u MLA marwei, ban pynbeit thymmai bad pynkhlaiñ ïa ka Party.”
U la bynrap ruh ba kum ka party ka bym don shuh haka Sorkar, ka UDP kan long laitluid ban rah ïa ki mat jingeh jong ki paidbah khlem ka jingshah teh shah khum ba don ha ka sorkar, hynrei kan leh halor ki nongrim ym tang ban kdew kti ïa ka sorkar.