Shillong, Naiwieng 3: U Myntri Rangbah ka Jylla Meghalaya u Conrad K. Sangma ha ka sngi thoh Ba-ar u la pynpaw ïa ka bynta jong ki Early Childhood Development (ECD) Fellow bad ki nongtrei Anganwadi ha ba pynkhlaiñ ïa ka jingsumar ïa ki khynnah rit bad ban saiñ dur ïa ka lawei jong ki khynnah ha ka jylla.
U Myntri Rangbah ka Jylla ula ïashim bynta ha ka prokram “Advancing Care Economy lyngba ka ECD Fellowship” hapoh ka Meghalaya Early Childhood Development Mission (MECDM), ha kaba la ai jingithuh ïa ki ECD Fellows jong ka jylla na ka bynta ki kam jong ki.
U Sangma u la ong ba ki ECD Fellows bad ki Anganwadi Workers ki dei ki budlum jong ka mishon, ha kaba ki jingpyrshang jong ki na trai ki long kiba pynleit jingmut ha kaba pynheh pynsan ïa ki khynnah rit, ban kyrshan ïa ki kmie ki kpa bad ban pynkhlain ïa ki rukom sumar ïa ki khynnah rit.
Lyngba ka MECDM, ka sorkar jylla ka thmu ban pynbha ïa ki rukom kyrshan kiba donkam ban ai ïa ki khynnah ïa ka jingsdang ka koit ba khiah bad kaba shngain ha ka jingim.
U Myntri Rangbah ka Jylla u la ong ba kane ka mission ka dei kaba la pyniadei bad u Myntri Rangbahduh ka ri u Narendra Modi.
