Shillong, Naiwieng 03 : Ka Games Technical Conduct Committee (GTCC) jong ka 39th National Games Meghalaya 2027, mynta ka sngi, ka la bishar bniah ïa ka jingpynkhreh jong ka jylla ban pynlong ïa kane ka jingïalehkai sport.
Ka committee ka la pynlong ïa ki jingïalang ha State Guest House, Taraghar, Shillong, bad hadien kata ka la leit jurip ïa ki jaka jingïalehkai bapher bapher ha nongbah Shillong. Ka committee kan don ha Meghalaya naduh ka 02 haduh ka 05 tarik u Naiwieng.
Ka GTCC ka don hapoh ka jingïalam jong ka Chairperson, ka Sunaina Kumari, ryngkat bad ki dkhot u Ravinder Choudhary, u Maninder Pal Singh, u V. Sunil Kumar bad u Dushyant Sharma. La donlang ruh ki nongïalam jong ka Meghalaya State Olympic Association kynthup naduh u Bah John F Kharshiing, Working President; Kong Matsiewdor War Nongbri, IAS (Retd.), Vice President bad u Bah Finely L. Pariat, General Secretary jong ka Meghalaya State Olympic Association (MSOA).
Ka jingïalang ka la sdang da ka jingïalang hapoh ka jingïalam jong u Dr. Vijay Kumar D., IAS, Commissioner bad Secretary jong ka tnad Sports and Youth Affairs, ha kaba la ai jingtip sha ka GTCC halor ka jingpynkhreh jong ka Meghalaya ban pynlong ïa ka 39th National Games.
Ha kane ka jingïalang la donlang ruh ka Kong Isawanda Laloo, IAS, Secretary; u Richard Yanthan, Joint Secretary; u Bah Alertson Nongbri, MCS, Director; u Bah Paia B. War Nongbri, Deputy Director, Sports and Youth Affairs; bad u Bah Pharngki Pale, In-charge Chief Engineer jong ka State Sports Council of Meghalaya (SSCM).
Hadien kane, ka committee ka la pynlong ïa ka jingïalang online bad ki nongmihkhmat jong ki jylla ka thaiñ Shatei Lam Mihngi (NER), ha kaba ki la ai jingtip lyngkot halor ka jingpynkhreh jong ki ban pynlong ïa ki jingïalehkai ha la ki jong ki jylla. Hadien kata, la pynlong ïa ka jingïalang halor ka jingpynkhreh ïa ka ACT bad ki kam pynïaid jong ka Games.
Ha ka por nohphai sngi pat na ka liang ka GTCC ka la leit jurip ïa hynriew tylli ki jaka ïalehkai ha Shillong. Kine ki long ka J.N. Sports Complex na ka bynta ka Athletics, Integrated Multipurpose Indoor Hall na ka bynta ka Basketball, Shillong Sports Association Ground na ka bynta ka Football, Shillong Golf Club na ka bynta ka Golf, Sports Authority of India Centre na ka bynta ka Rugby, Fencing bad Boxing, bad NEHU Campus na ka bynta ka Cycling (MTB).
Ha ka 04 tarik u Naiwieng pat kata ha kane ka sngi Balang, ka committee kan bishar bniah ïa ki rukom treikam jong ka Games bad bteng ïa ka jingjurip ïa ki jaka ïalehkai ha Shillong bad ruh ha Jowai.
