Plie paidbah u Bah Shangpliang ïa ka 2nd Invitation Knockout Football Tournament

Shillong, Naiwieng 03 : Kum shi bynta ban kyntiew ïa ki khun samla jong ka dong ka thain Balat ha ka kam ïalehkai football ka Umsawrang Sport Club & Youth Welfare Organisation ka la plie paidbah biang ïa ka 2nd Invitation Knock Out Football Tournament ha madan Umsawrang ha ka sngi Nyngkong mynta ka taiew.
Ïa kane ka lympung la wan ban plie paidbah da u Bah Himalaya M Sahngpliang uba dei u MLA barim jong ka Mawsynram uba dei ruh u nongaiktien jong ka National People Party ha ka jingsakhi lang bad ki riew rangbah jong ka dong ka thain.
Ha shwa ban sdang ka jingïaleh kai hapdeng ka team jong ka Meghalaya Police (MLP FC) pyrshah ïa ka Khaikuna (AIU FC) na Ryngku ka la don shwa ka jingïalang ba lyngkot.
Haba kren kum u kongsan u Bah HM Lyngba u la pyntip ba u Sport Minister u la dep ban mang ïa ka pisa na ka bynta ban shna pynbha ïa ka stadium kynthup naduh ki jaka shong, ki jingker ïa ka madan bad kiwei kiwei ha ka mang tyngka kaba 4.57 klur.
Shwa kane u Bah Shangpliang u la ïathuh ba tang shu ïoh jingtip ba ka Sport Club kala dep ban aiti da ka dorkhas sha u Bah Wailadmiki Shylla, na ka liang jong u u la buddien ïa kane ka kam tad haduh ba u myntri u la pyntip ban la dep ban mang na ka bynta kane ka madan.
Kane ka jingpynbna u Bah Shangpliang kala pynhun ïa ki nongkit kam jong ka sport club bad kumjuh ruh ïa ki paidbah ba kibaieit ïa ka football hapoh ka dong ka thain namar ba kane ka madan kadei kaba biang bad kaba paka bha.
Haba phai ha ka jingïalehkai ha ka kylla step ka kynhun MLP kala ïoh bun ki kabu bad kumjuh ruh ka Khaikuna hynrei baroh kim shym lah lah ban pynkhih jar bad dei tad ha shwa ban kut ka kylla step ka MLP kala ïoh ban pynkhih ïa ka jar da kaba tam 1-0.
Haba sdang ka kylla miet ka MLP kala lehkai bha bad ka MLP kala ïoh ban thep haduh saw goal ha ka kylla miet da kaba jop ïa ka Khaikuna da 5-0 bad ka MLP kala ïoh ban khur ïa ka point ba kordor.