Hadien 13 bnai tam wanphai biang u Bah Paul sha Secretariat kum u Myntri Sorkar

Shillong, Naiwieng 02 : Ka shim por tang kumba 13 bnai tam ei ei ïa u MLA ka West Shillong, u Paul Lyngdoh ban ïoh wanphai biang sha Secretariat kum u Myntri Sorkar hadien ba u la ngat ha ka jingshah kylliang shuki Myntri kaba la jia ha u Nailur jong u snem ba la dep.
U Lat ka Jylla Meghalaya, u C.H. Vijayashankar, u la pynsmai ïa u Paul Lyngdoh kum u Myntri ha ka jingïalang kaba la long ha Lok Bhavan, Shillong ryngkat ka jingsakhi lang naduh u Myntri Rangbah Conrad K Sangma, ki Symbud Myntri Rangbah, ki Myntri Sorkar, ki heh sorkar bad kiwei kiwei. Da kane, u kylla long ruh u Myntri uba 12 jong ka kynhun Myntri ba la ïalam da u Myntri Rangbah, u Conrad K Sangma hadien ba kawei ka shuki Myntri ka la shong thylli da ka jingresain noh jong u Bah Metbah Lyngdoh na ka shuki Myntri ka tnad Bording.
Lah ban kdew hangne ba u Bah Paul u la pyndep ïa ka jingsmai kum u Myntri Sorkar ha ka sien kaba ar tang ha kine ki lai snem tam hapoh ka sorkar synrop jong ka Meghalaya Democratic Alliance kaba ïalam da ka NPP. Tangba ha ka sien kaba nyngkong u la wan kum u Myntri na ka party UDP hynrei ha kane ka sien kum u Myntri na ka party NPP.
Shwa kane, u Bah Paul u la bat teng kum u Myntri ka tnat Tourism ha ka Sorkar ba la ïalam da u Conrad Sangma, hynrei la weng noh ïa u ha ka jingpynkylla ïa ka kynhun Myntri kaba la long ha ka 16 tarik u Nailur, 2025.
Ka jingwanphai jong u Paul Lyngdoh sha ka kynhun Myntri ka wan tang hadien katto katne sngi ba u la mih noh na ka United Democratic Party (UDP) bad pynïasoh sha ka National People’s Party (NPP) kaba bat ïa ka bor synshar, ryngkat bad ar ngut kiwei pat ki MLA barim ka UDP, u Renikton Lyngdoh Tongkhar bad u Nujorki Sungoh.
U Bah Paul Lyngdoh u la shimti ïa ka jaka kaba lait hadien ba u President ka UDP, u Metbah Lyngdoh, u la iehnoh ïa ka kam Myntri Sorkar ha ka 31 tarik u Risaw, hapdeng ki jingkylla ha ka saiñ pyrthei hapoh ka party jong u.
Ka jingpynrung biang ïa u sha ka kynhun Myntri ka wan hapdeng ki jingkylla ha ka saiñ pyrthei ha Meghalaya, hadien ba 11 ngut na ki 12 ngut ki MLA ka UDP ki la mih noh na ka party. Napdeng kine, 8 ngut ki MLA barim ka UDP ki la pynïasoh sha ka BJP, katba 3 ngut, kynthup ïa u Paul Lyngdoh, ki la leit sha ka NPP.
Watla na ka liang u Myntri Rangbah um pat pynpaw satia kaei ka tnad kaba un ai ïa u Bah Paul hynrei na ka liang une u MLA u la ïathuh ba u kham noh ka mynsiem sha ka tnad Kamjngohkai pyrthei namar u kham don ka jingsngewtynnad bad ka jingshemphang nalor ba u don ruh ka jingthrang shuh shuh ban kyntiew ïa kane ka tnad.