12 haduh 18 tarik yn sdang ka EUFF ha Nongbah Shillong bad yn wanrah 21 tylli ki phlim ba la ïohkhusnam

Shillong, Naiwieng 02: Kan long ba ha ka sien kaba nyngkong yn pynlong ïa ka European Union Film Festival (EUFF) kaba 31, ha Shillong ka ban sdang naduh ka 12 tarik haduh ka 18 tarik u Naiwieng, ha kaban yn wanrah lang ïa ki 21 tylli ki phlim kiba la jop ïa ki khusnam na ki dkhot jong ka European Union sha ki nongpeitkai jong ka jylla Meghalaya.
La ong ba Ïa kane ka tamasa yn pynlong da ka kynhun jong ka European Union India ryngkat ka jingïatreilang bad ka EU Member States, kane ka tamasa kan pyni ïa ki phlim na ka dewbah Europe kiba ïadei bad ki bynta jong ka jinglong tynrai, kaba ïadei bad ka jinglong kynthei bad shynrang, ki longïing longsem, ki kabu bad ki jingïadei parabriew bad ki jingkylla ha ka imlang sahlang nalor kiwei kiwei pat.
Ha kaba ïadei bad kane, kane ka tamasa ka ban long ha Shillong kadei ruh kaba la pynlong ryngkat ka jingïatreilang bad ka Asian Confluence Centre. Ka jingpyni ïa ki phlim kan long ha ki 4 tylli ki jaka kaba kynthup ïa ka Asian Confluence Centre (The Habitat), Lady Keane College, St. Edmund’s College bad KL Bajoria College.
Ki phlim kiba la pynmih da ki nongpynmih phlim ba pawnam ka Europe ki kynthup ïa ka Sandra Hüller-Starrer Rose na Austria, Oliver Laxe’s jong ka phlim na Spain Sir?t, ka drama na ri France ‘The Richest Woman in the World’ bad na Italy kaba la tip kum ka ‘A Year of School’.
Kiwei pat ki phlim ki kynthup ïa ka Bring Me Home (Bulgaria), Drazen (Croatia), Maricel (Cyprus), The Last Viking (Denmark), Stormskerry Maja (Finland), DODO (Greece), 22 Lengths (Germany), Mommy Blue (Hungary), Wolfwalkers (Ireland), Maria’s Silence (Latvia), Sand in Your Hair (Lithuania), A Boat in the Garden (Luxembourg), Jippie No More (Netherlands), No Ghosts on Good Street (Poland), Projecto Global (Portugal), Path to the Impossible (Slovakia) bad ka Hidden People (Slovenia).
Shuh shuh halor kane, u Jean-Eric Paquet, Ambassador jong ka European Union sha India, ula ong, ba ka Shillong kadei ka jaka kaba biang bha ban sdang ïa kane ka tamasa phlim namar ba ka don ïa ki kolshor kiba ïar bad ka jingïaroh ïa ka jingïathuh ïa ki khana.
Ula ong ba ka tamsa ka tyrwa sha ki paidbah ïa ki kabu ban shemphang shaphang ka Europe lyngba ki kam jong ki nongshna phlim bad ban ïoh ïa ka jingsngewthuh kaba ïar halor ki khana kiba bun jait shaphang ki briew.
La khmih lynti ïa u Paquet ban wanpoi ha Shillong ha ka 13 tarik u Naiwieng ban ïashim bynta ha kane ka jingpyni paidbah ïa ki phlim.
Shuh shuh u Artur Zaborski, u nongpynwandur ïa kane ka tamasa, ula ong ba ka jingjied ban wanrah ïa ki sur bad ki khana ha ki kolshor bapher, ka ktien ka thylliej bad kiwei kiwei ki bynta. Ki phlim kin pyni ïa ki sobjek kiba bun naduh na ka kam saiñ pyrthei, ka imlang sahlang, ki longïing longsem, jingieid bad ka jinglong trai.
Katba u Sabyasachi Dutta, Executive Director ka Asian Confluence Centre, ula ong ba ka jingpynlong ïa kane ka tamasa kan thaw ïa ki kabu na ka bynta ka jingkren halor ki kolshor bad ban pynkhlaiñ ïa ka jingïadei hapdeng ka dewbah Europe bad ka thaiñ shatei lammihngi jong ka ri India.
Ha kane ka kynti kaba mynta, la ong ba yn sdang ruh ïa ka EUFF Film Project, ka sienjam ban ai rynsan ïa ki samla bad ïa ki nongshna phlim jong ka ri India. Lyngba kane ka projek la khot pyni ïa ki phlim lyngkot kiba 5 haduh 10 minit halor ki mat ki bapher bapher kynthup ïa ka jinglong tynrai, ka jingphet shnong, ki jingkynmaw kiba ïadei bad ka kolshor, ka jingshem jong ki kynthei, ki khana kiba phylla, ka jingkylla ka mariang bad ki jaidbynriew riewlum.
Shuh shuh la ong ba Ïa ki 10 tylli ki phlim kiba pawnam ka ri India yn pyni paitbah ha kane ka tamasa ka ban long ha Delhi. Hadien ka Shillong, yn pynlong ïa kane ka tamasa ha New Delhi naduh ka 25 tarik u Naiwieng haduh ka 4 tarik u Nohprah bad yn leit pynlong ruh sa ha Pune ha u Nohprah.
Ka jingpyni ïa kine ki phlim baroh ha Shillong kan dei kaba pyni ei bad ki paitbah ki lah ban leit peitkai katkum ka jinglah ban poi kloi (first-come, first-served) bad ka long ruh kaba donkam pat ban rejistar ïalade, nalor kiwei kiwei pat ki kam.