Shillong, 26 Risaw: Ka Office jong u Chief Electoral Officer (CEO), Meghalaya ha ka sngi Nyngkong ka la pynmih ïa ka thup kyrteng kaba khatduh jong ki nongthep vote lane ka Final Photo Electoral Roll jong baroh 60 tylli ki Assembly Constituency ha Meghalaya, hadien ba la pyndep ïa ka Special Intensive Revision (SIR) jong ki thup kyrteng nongthep vote, 2026.
Katkum ka jingpynbna, ka thup kyrteng ba khatduh ka don baroh 21,83,963 ngut ki nongthep vote, kaba kynthup ïa 10,59,743 ngut ki shynrang, 11,24,216 ngut ki kynthei bad 4 ngut ki nongthep vote Third Gender.
Ka jingdon jong ki nongthep vote ka la kiew da 14,720 ngut, lane kumba 0.68 percent, haba ïanujor bad ka Draft Electoral Roll kaba la pynmih ha ka 5 tarik Nailar, 2026.
Shuwa ban sdang ïa ka SIR, ka Meghalaya ka don 23,49,645 ngut ki nongthep vote. Ha ka por ba pynlong ïa ka jinglum jingtip na ïing sha ïing, la sam 23,49,645 tylli ki Enumeration Forms, hynrei tang 21,69,243 tylli la ïoh pdiang biang. Ki 1,80,402 ngut kiba ym shym la ïoh pdiang ïa ki form jong ki, la pynpaw ha ki daw bapher bapher, kynthup ïa kiba ym shym la lap, kiba la kynriah jaka sah, kiba la khlad bad ki kyrteng kiba la pynrung palat shisien.
Hadien ka jingpynmih ïa ka Draft Electoral Roll, la pynlong ïa ki jingbishar bad jingpynshisha ïa ki kyrteng. La phah 6,51,735 tylli ki notice sha ki nongthep vote kiba don ki jingduna ha ka mapping lane kiba ym shym la ïoh mapping, bad la pyndep ïa baroh ki jingbishar. Hadien ka jingbud ïa ki rukom treikam ba la buh, la weng noh ïa ki kyrteng jong 6,724 ngut.
Ha ka por ba pdiang ïa ki jingkyrpad bad jingpyrshah, la pdiang 21,694 tylli ki application ban pynrung kyrteng, 2,276 tylli ban pynkylla jaka sah, 2,526 tylli ban weng kyrteng bad 12,860 tylli ban pynbeit ïa ki jingtip jong ki nongthep vote.
Ka ophis jong u CEO ka la kyntu ïa baroh ki nongthep vote ban peit bniah ïa ki kyrteng bad ki jingtip jong ki ha ka Final Electoral Roll lyngba kine ki lad -Voters’ Services Portal: https://voters.eci.gov.in, Chief Electoral Officer, Meghalaya: https://ceomeghalaya.nic.in, ECINET Mobile Application, Ki Booth Level Officers (BLOs), Ki ophis jong ki Electoral Registration Officers (EROs) bad Assistant Electoral Registration Officers (AEROs)
Ka ophis ka la pyntip ruh ba yn pynlong ïa ki special enrolment camp ha baroh ki distrik jong ka jylla, khnang ban pynsuk ïa ki nongshong shnong kiba dei hok ban thep vote, khamtam ïa kiba la shah iehnoh shadien ha ka Final Electoral Roll, ki samla kiba dang dei ban thep vote nyngkong, ki ba la noh ka rta bad ki briew kiba don jingthut ha ki dkhot met kiba donkam jingïarap.
Ki nongshong shnong kiba dei hok ban thep vote hynrei kiba ym shem ïa ki kyrteng jong ki ha ka thup ba khatduh, ki lah ban aplai ban pynrung kyrteng lyngba ka Form 6. Ki application ban weng kyrteng, pynbeit ïa ki jingtip lane pynkylla jaka sah, lah ban phah lyngba ka Form 7 bad Form 8, katkum ka jingdonkam, ong ka kyrwoh na ka ophis u CEO.
Kane ka long katkum ka kyrwoh ba la phah da u CEO ka Jylla, Dr. BDR Tiwari.
